మలాలా యూసఫ్‌జాయ్: బుల్లెట్లను జయించిన కలం..

మలాలా యూసఫ్‌జాయ్ విద్యా హక్కు కోసం ప్రపంచ మనస్సాక్షిగా నిలిచిన యువ నాయకురాలు.

“ఒక పిల్లవాడు, ఒక ఉపాధ్యాయుడు, ఒక పుస్తకం, ఒక కలం ప్రపంచాన్ని మార్చగలవు.” 21వ శతాబ్దంలో విద్యను అత్యంత శక్తివంతమైన సామాజిక మార్పు సాధనంగా ప్రపంచం గుర్తించినప్పటికీ, ఇప్పటికీ కోట్లాది మంది పిల్లలకు, ముఖ్యంగా బాలికలకు, పాఠశాల గడప దాటే అవకాశం దక్కడం లేదు.

పేదరికం, యుద్ధాలు, తీవ్రవాదం, లింగ వివక్ష, బాల్య వివాహాలు, సామాజిక మూఢనమ్మకాలు లాంటి కారణాలు వారి విద్యను అడ్డుకుంటున్నాయి.

ఇలాంటి పరిస్థితుల్లో, ఒక చిన్నారి తన వ్యక్తిగత భద్రతకంటే విద్యా హక్కును గొప్పదిగా భావించి ప్రపంచం ముందు నిలిచింది. ఆ చిన్నారి పేరు మలాలా యూసఫ్‌జాయ్. ఆమె కథ ఒక వ్యక్తి జీవిత చరిత్ర మాత్రమే కాదు. అది విద్య, సమానత్వం, మహిళా సాధికారత, మానవ హక్కుల కోసం సాగుతున్న ప్రపంచ పోరాటానికి ప్రతీక.

మలాలా 1997 జూలై 12న పాకిస్తాన్‌లోని ఖైబర్ పఖ్తూన్‌ఖ్వా రాష్ట్రంలోని స్వాత్ లోయలో జన్మించింది. ఒకప్పుడు “తూర్పు స్విట్జర్లాండ్”గా పేరొందిన ఈ ప్రాంతం తన ప్రకృతి సౌందర్యానికి ప్రసిద్ధి చెందింది. కానీ 2000ల మధ్యకాలంలో అక్కడ తీవ్రవాద ప్రభావం పెరిగి ప్రజల జీవితం పూర్తిగా మారిపోయింది.

మలాలా తండ్రి జియౌద్దీన్ యూసఫ్‌జాయ్ ఉపాధ్యాయుడు, విద్యా సంస్కర్త. ఆయన నిర్వహించిన పాఠశాలలో బాలురు, బాలికలు సమానంగా చదువుకునేవారు. విద్య సమాజాన్ని మార్చగలదనే విశ్వాసాన్ని ఆయన తన కుమార్తెలో చిన్ననాటి నుంచే నాటారు.

తాలిబాన్ ప్రభావం..

2007 నాటికి స్వాత్ ప్రాంతంలో తాలిబాన్ ప్రభావం తీవ్రంగా పెరిగింది. వారి నియంత్రణలోకి వచ్చిన ప్రాంతాల్లో బాలికల పాఠశాలలను మూసివేశారు.

వందలాది విద్యాసంస్థలను పేల్చివేశారు. మహిళలు బయటకు రావడంపై ఆంక్షలు విధించారు. రేడియో ప్రసారాల ద్వారా భయాన్ని వ్యాప్తి చేశారు. బాలికలు చదవడం “అనవసరం” అనే భావజాలాన్ని ప్రచారం చేశారు.

విద్యపై దాడి అంటే సమాజ భవిష్యత్తుపై దాడి అని చెప్పవచ్చు. అయితే భయంతో మౌనం పాటించిన వారిలో మలాలా లేదు.

2009లో కేవలం 11 సంవత్సరాల వయసులో మలాలా, ఒక కలం పేరుతో బీబీసీ ఉర్దూ కోసం డైరీ రాయడం ప్రారంభించింది. తాలిబాన్ పాలనలో బాలికల జీవితం ఎలా ఉందో, పాఠశాలకు వెళ్లే ప్రతి రోజు ఎలా భయంతో గడుస్తుందో ఆమె ప్రపంచానికి తెలియజేసింది.

ఆ డైరీలు ప్రపంచవ్యాప్తంగా దృష్టిని ఆకర్షించాయి. ఒక చిన్నారి స్వరం అంతర్జాతీయ చర్చకు కారణమైంది.

ప్రజా జీవితంలో అడుగు..

ఆ తరువాత మలాలా పలు సమావేశాల్లో, టెలివిజన్ కార్యక్రమాల్లో పాల్గొంటూ బాలికల విద్యా హక్కు గురించి బహిరంగంగా మాట్లాడటం ప్రారంభించింది. ఆమె సందేశం సులభమైనదే. అయినా అత్యంత శక్తివంతమైనది: “చదువుకోవడం ప్రతి ఒక్కరి హక్కు.”

కాల్పుల ఘటన – ప్రపంచాన్ని కుదిపేసిన దారుణం..

2012 అక్టోబర్ 9న పాఠశాల ముగించుకొని బస్సులో ఇంటికి వెళ్తున్న మలాలాను తాలిబాన్ తీవ్రవాదులు లక్ష్యంగా చేసుకున్నారు. బస్సును ఆపి, “మలాలా ఎవరు?” అని అడిగి ఆమెపై కాల్పులు జరిపారు.

తలకు తగిలిన బుల్లెట్ ఆమెను తీవ్రంగా గాయపరిచింది. ఈ వార్త ప్రపంచవ్యాప్తంగా తీవ్ర ఆందోళన కలిగించింది. ఐక్యరాజ్యసమితి, అనేక దేశాల ప్రభుత్వాలు, మానవ హక్కుల సంస్థలు ఈ దాడిని తీవ్రంగా ఖండించాయి.

మలాలాను అత్యవసర చికిత్స అనంతరం యునైటెడ్ కింగ్‌డమ్‌కు తరలించారు. అనేక శస్త్రచికిత్సలు, దీర్ఘకాల చికిత్స తర్వాత ఆమె కోలుకుంది.

బుల్లెట్ కంటే బలమైన సంకల్పం..

చాలామంది అయితే ఇలాంటి సంఘటన తర్వాత ప్రజా జీవితానికి దూరమయ్యేవారు. కానీ మలాలా అలా చేయలేదు. “వారు నా గొంతును ఆపాలని అనుకున్నారు. కానీ ఆ దాడి తర్వాత లక్షలాది గొంతులు నా వెంట నిలిచాయి” అని అన్న ఈ మాటలు ఆమె ఉద్యమానికి ప్రపంచవ్యాప్త మద్దతును ప్రతిబింబించాయి.

ఐక్యరాజ్యసమితి వేదికపై చరిత్ర..

2013 జూలై 12— తన 16వ పుట్టినరోజున ఐక్యరాజ్యసమితి యువజన సభలో మలాలా ప్రసంగించింది. ఆ ప్రసంగం ఆధునిక చరిత్రలో అత్యంత ప్రభావవంతమైన యువజన ప్రసంగాలలో ఒకటిగా గుర్తించబడింది.

ఆమె ప్రపంచ నాయకులకు చేసిన విజ్ఞప్తి: ప్రతిఒక్కరికి ఉచిత, నాణ్యమైన విద్య అందించాలి. బాలికల విద్యను ప్రభుత్వాలు అత్యున్నత ప్రాధాన్యంగా చూడాలి. పేదరికం, యుద్ధం, తీవ్రవాదం వల్ల విద్య కోల్పోతున్న పిల్లలను రక్షించాలి. పుస్తకాలు, ఉపాధ్యాయులు, పాఠశాలలు శాంతి నిర్మాణానికి ఆయుధాల కంటే శక్తివంతమైనవి.

అప్పటి నుంచి జూలై 12ను ప్రపంచవ్యాప్తంగా “మలాలా డే”గా పాటిస్తున్నారు.

ప్రపంచానికి ఒక చిహ్నం..

మలాలా వ్యక్తిగతంగా గాయపడినా, ఆమె ఆలోచనలను ఎవరూ గాయపరచలేకపోయారు. ఒక చిన్నారి ధైర్యం ప్రపంచవ్యాప్తంగా విద్యా హక్కు కోసం జరుగుతున్న ఉద్యమాలకు కొత్త ఉత్సాహాన్ని ఇచ్చింది.

ఆమె జీవితం మనకు చెప్పే మొదటి పాఠం ఇదే. విద్య అనేది కేవలం వ్యక్తిగత అభివృద్ధి కోసం కాదు. సమానత్వం, ప్రజాస్వామ్యం, సామాజిక న్యాయం కోసం కూడా అత్యంత శక్తివంతమైన సాధనం.

ప్రపంచంలో బాలికల విద్య: విజయాలు, సవాళ్లు, భారతదేశ పరిస్థితి..

మలాలా యూసఫ్‌జాయ్ పేరు వినగానే మనకు ఒక ప్రశ్న ఎదురవుతుంది. 21వ శతాబ్దంలో కూడా బాలికల విద్య కోసం ఇంత పెద్ద ఉద్యమం అవసరమా? సాంకేతికత అపూర్వంగా అభివృద్ధి చెందిన ఈ కాలంలోనూ ప్రపంచంలోని లక్షలాది మంది బాలికలు ఇప్పటికీ పాఠశాల గడప దాటలేకపోతున్నారు. ఇది వ్యక్తిగత విషాదం ఎంత మాత్రం కాదు. ప్రపంచ అభివృద్ధికి ఒక పెద్ద అడ్డంకి.

విద్య – మానవ హక్కు..

ఐక్యరాజ్యసమితి సార్వత్రిక మానవ హక్కుల ప్రకటన 1948లో విద్యను ప్రతి మనిషి ప్రాథమిక హక్కుగా ప్రకటించింది. అనంతరం పిల్లల హక్కులపై ఐరాస ఒప్పందం 1989, అలాగే సుస్థిర అభివృద్ధి లక్ష్యాలలోని లక్ష్యం–4 ద్వారా 2030 నాటికి అందరికీ సమానమైన, నాణ్యమైన విద్య అందించాలని ప్రపంచ దేశాలు అంగీకరించాయి.

అయితే వాస్తవ పరిస్థితి ఇంకా ఆ లక్ష్యానికి చాలా దూరంలో ఉంది.

ప్రపంచంలో బాలికల విద్య – గణాంకాలు ఏమి చెబుతున్నాయి?..

యునెస్కో, యూనిసెఫ్, ప్రపంచ బ్యాంకు లాంటి సంస్థల అధ్యయనాలు ఆందోళనకరమైన చిత్రాన్ని చూపుతున్నాయి.

ప్రపంచవ్యాప్తంగా సుమారు 250 మిలియన్లకు పైగా పిల్లలు, యువత పాఠశాల విద్యకు పూర్తిగా దూరంగా ఉన్నారు. వారిలో గణనీయమైన భాగం బాలికలే. తక్కువ ఆదాయ దేశాలలో మాధ్యమిక విద్య పూర్తిచేసే బాలికల శాతం చాలా తక్కువ. యుద్ధాలు, అంతర్గత ఘర్షణలు ఉన్న ప్రాంతాలలో బాలికల విద్య తీవ్రంగా దెబ్బతింటోంది.

ఆఫ్ఘానిస్తాన్, కొన్ని ఆఫ్రికా దేశాలు, యుద్ధ ప్రభావిత ప్రాంతాలు ఇంకా బాలికల విద్య విషయంలో తీవ్రమైన సంక్షోభాన్ని ఎదుర్కొంటున్నాయి.

బాలికల విద్యకు ప్రధాన అవరోధాలు..

1. పేదరికం – అనేక కుటుంబాలు ఆర్థిక ఇబ్బందుల కారణంగా పిల్లలను, ముఖ్యంగా బాలికలను, పాఠశాలలకు పంపలేకపోతున్నాయి. కొన్నిచోట్ల బాలికలు కుటుంబ ఆదాయానికి తోడ్పడాల్సి వస్తోంది.
2. బాల్య వివాహాలు – ఇప్పటికీ అనేక దేశాలలో చిన్న వయస్సులోనే బాలికల వివాహాలు జరుగుతున్నాయి. వివాహం అనంతరం చదువు దాదాపు పూర్తిగా నిలిచిపోతుంది.
3. లింగ వివక్ష – “అబ్బాయిల చదువే ముఖ్యం” అనే భావన ఇంకా సమాజంలో కొనసాగుతోంది. దీనివల్ల బాలికల విద్యను రెండో స్థానానికి నెడుతున్నారు.
4. యుద్ధాలు, తీవ్రవాదం – సాయుధ ఘర్షణలు జరిగే ప్రాంతాల్లో పాఠశాలలు ధ్వంసమవుతున్నాయి. విద్యార్థులు, ఉపాధ్యాయులు భద్రతా సమస్యలను ఎదుర్కొంటున్నారు. మలాలా కథ దీనికి ప్రతీక.
5. పరిశుభ్రమైన వసతుల లేమి – గ్రామీణ ప్రాంతాల్లో బాలికలకు ప్రత్యేక మరుగుదొడ్లు, భద్రతాయుత రవాణా, పరిశుభ్రమైన పాఠశాల వాతావరణం లేకపోవడం వల్ల చాలా మంది చదువును మధ్యలోనే మానేస్తున్నారు.

విద్య – ఆర్థికాభివృద్ధికి పునాది..

బాలికల విద్యను కేవలం సామాజిక న్యాయం కోణంలో మాత్రమే చూడలేం. ఇది ఆర్థికాభివృద్ధికి చాలా కీలకం.
పలు అధ్యయనాలు సూచిస్తున్న అంశాలు: చదువుకున్న మహిళలు మెరుగైన ఆరోగ్యాన్ని, కుటుంబ సంక్షేమాన్ని ప్రోత్సహిస్తారు. శిశు మరణాల రేటు తగ్గుతుంది. కుటుంబ ఆదాయం పెరుగుతుంది. బాల్య వివాహాలు తగ్గుతాయి. తదుపరి తరాల విద్యా స్థాయి మెరుగుపడుతుంది.

అందుకే విద్యపై పెట్టుబడి అనేది ఖర్చు కాదు, అది దేశ భవిష్యత్తుపై పెట్టుబడి.

భారతదేశ పరిస్థితి..

భారతదేశం గత రెండు దశాబ్దాల్లో బాలికల విద్యలో కొంత పురోగతి సాధించింది. ప్రాథమిక విద్యలో బాలికల నమోదు శాతం పెరిగింది.

సమగ్ర శిక్ష, మధ్యాహ్న భోజన పథకం, ఉచిత పాఠ్య పుస్తకాలు, యూనిఫారాలు, స్కాలర్‌షిప్‌లు లాంటి కార్యక్రమాలు సానుకూల ప్రభావం చూపించాయి.

అనేక రాష్ట్రాలు బాలికల ఉన్నత విద్యకు ప్రత్యేక ప్రోత్సాహక పథకాలను అమలు చేస్తున్నాయి.

కొనసాగుతున్న సమస్యలు..

గ్రామీణ ప్రాంతాల్లో మాధ్యమిక విద్య తర్వాత డ్రాప్‌అవుట్ రేటు, బాల్య వివాహాలు, గిరిజన, దూర ప్రాంతాల బాలికలకు విద్య అందుబాటులో లేకపోవడం, డిజిటల్ అసమానత, పేద కుటుంబాల ఆర్థిక ఒత్తిళ్లు.

డిజిటల్ విభజన..

కోవిడ్-19 కాలంలో ఆన్‌లైన్ విద్య విస్తరించినప్పటికీ, స్మార్ట్‌ఫోన్‌లు, ఇంటర్నెట్ సౌకర్యం అందరికీ లేకపోవడం వల్ల లక్షలాది మంది విద్యార్థులు, ముఖ్యంగా గ్రామీణ బాలికలు, చదువులో వెనుకబడ్డారు. ఇది ఆధునిక కాలంలో విద్యా అసమానతకు కొత్త రూపంగా మారింది.

మలాలా ఉద్యమం ఇచ్చిన సందేశం..

మలాలా పోరాటం పాకిస్తాన్‌కే పరిమితం కాలేదు. ఆమె ప్రపంచ దేశాలకు ఒక ప్రశ్న వేసింది. “విద్య ప్రతి చిన్నారి హక్కు అయితే, ఇంకా ఎందుకు కోట్లాది మంది పిల్లలు పాఠశాలలకు దూరంగా ఉన్నారు?”- ఈ ప్రశ్నకు ప్రభుత్వాలే సమాధానం చెప్పాలి.

సామాజిక బాధ్యత..

బాలికల విద్యకు ప్రభుత్వ బాధ్యతకు అదనంగా కుటుంబాలు కూడా సమాన అవకాశాలు కల్పించాలి. సమాజం లింగ వివక్షను నిరాకరించాలి.

ఉపాధ్యాయులు ప్రోత్సాహకులుగా నిలవాలి. మీడియా విద్యా ప్రాధాన్యతను విస్తృతంగా చర్చించాలి. పౌర సమాజ సంస్థలు వెనుకబడిన వర్గాలకు తోడ్పడాలి.

మలాలా వ్యక్తిగత ధైర్యం ప్రపంచాన్ని కదిలించింది. అయితే ఆమె అసలు విజయం ఒక వ్యక్తిగా నిలవడంలో కాదు. బాలికల విద్య అనే అంశాన్ని ప్రపంచ రాజకీయాలు, అభివృద్ధి విధానాలు, మానవ హక్కుల చర్చల కేంద్రంగా తీసుకురావడంలో ఉంది.

ఆమె పోరాటం మనకు గుర్తు చేసేది ఒకే విషయం ఏమంటే “ఒక దేశం నిజమైన అభివృద్ధిని సాధించాలంటే, ప్రతి బాలిక పాఠశాల గడప దాటాలి. విద్య లేకుండా సమానత్వం సాధ్యం కాదు. సమానత్వం లేకుండా ప్రజాస్వామ్యం సంపూర్ణం కాదు”.

ప్రపంచ ప్రభావం, విమర్శలు, భవిష్యత్తు పాఠాలు..

మలాలా యూసఫ్‌జాయ్ పేరు నేడు ప్రపంచవ్యాప్తంగా విద్యా హక్కుకు ప్రతీకగా నిలిచింది. అయితే ఏ ప్రపంచ నాయకుడి లాగానే, ఆమె చుట్టూ ప్రశంసలతో పాటు విమర్శలు కూడా ఉన్నాయి. ఒక వ్యక్తిని అర్థం చేసుకోవాలంటే కేవలం అభిమానంతో గానీ, విమర్శతో గానీ కాకుండా వాస్తవాల ఆధారంగా సమతుల్యంగా చూడాలి.

నోబెల్ శాంతి బహుమతి – ఒక వ్యక్తికి కాదు, ఒక విలువకు గుర్తింపు..

2014లో మలాలా యూసఫ్‌జాయ్, భారత బాలల హక్కుల ఉద్యమకారుడు కైలాష్ సత్యార్థితో కలిసి నోబెల్ శాంతి బహుమతిని అందుకుంది.

ఈ అవార్డు మలాలా వ్యక్తిగత ధైర్యానికి మాత్రమే కాదు. ప్రతి బాలుడికి, ప్రతి బాలికకు విద్య ఒక మౌలిక హక్కు అనే సూత్రానికి అంతర్జాతీయ గుర్తింపుగా నిలిచింది.

భారతదేశానికి చెందిన కైలాష్ సత్యార్థి, పాకిస్తాన్‌కు చెందిన మలాలా ఒకే వేదికపై నిలవడం కూడా దక్షిణాసియాలో శాంతి, బాలల హక్కులు, విద్యకు ప్రతీకగా ప్రపంచం చూసింది.

మలాలా ఫండ్ – ఉద్యమం నుంచి సంస్థాగత కృషికి..

కాల్పుల ఘటన తర్వాత మలాలా కేవలం ప్రసంగాలకే పరిమితం కాలేదు. ఆమె స్థాపించిన మలాలా ఫండ్ ద్వారా పలు దేశాల్లో బాలికల విద్య కోసం పనిచేస్తోంది.

ఈ సంస్థ ప్రధానంగా పాఠశాలలకు దూరమైన బాలికలకు విద్యా అవకాశాలు కల్పించడం, స్థానిక మహిళా నాయకత్వాన్ని ప్రోత్సహించడం, విద్యా విధానాలపై ప్రభుత్వాలతో చర్చించడం, ఘర్షణలు, యుద్ధాలు, శరణార్థి పరిస్థితుల్లో ఉన్న బాలికలకు మద్దతు ఇవ్వడం లాంటి కార్యక్రమాలు నిర్వహిస్తోంది.

ప్రపంచ నాయకులతో సంభాషణ..

మలాలా ఐక్యరాజ్యసమితి వేదికలతో పాటు అనేక దేశాల ప్రభుత్వాధినేతలను కలుసుకుంది. ప్రపంచ ఆర్థిక వేదికలు, విద్యా సదస్సులు, మానవ హక్కుల సమావేశాల్లో ఆమె ప్రసంగాలు అంతర్జాతీయ చర్చలకు దారి తీశాయి. దీని వల్ల బాలికల విద్య ఒక “సామాజిక సమస్య” నుంచి “అభివృద్ధి విధానాల కేంద్ర అంశం”గా మారింది.

వచ్చిన విమర్శలు..

“పాశ్చాత్య దేశాలు మలాలాకు అసాధారణ స్థాయిలో ప్రచారం కల్పించాయి. ప్రపంచంలోని ఇతర ప్రాంతాల్లో విద్య కోసం ప్రాణాలు పణంగా పెట్టిన కార్యకర్తలకు అంతగా గుర్తింపు లభించలేదు. పాకిస్తాన్‌లోని సామాజిక, రాజకీయ సమస్యలను ఒకే కోణంలో చూపించారనే విమర్శలు కూడా వచ్చాయి” అని కొంతమంది విశ్లేషకులు అభిప్రాయపడుతున్నారు.

మరోవైపు, మలాలా మద్దతుదారులు చెప్పేదేమంటే ఆమెపై జరిగిన కాల్పులు ఒక వాస్తవ సంఘటన. బాలికల విద్య కోసం ఆమె చేసిన కృషి నిరంతరమైనది. విద్యా హక్కు కోసం ప్రపంచవ్యాప్తంగా చర్చను విస్తరించడంలో ఆమె పాత్ర అనన్య సామాన్యం.

ఈ రెండు కోణాలను పరిశీలించినప్పుడు, ఒక విషయం స్పష్టమవుతుంది. మలాలా ప్రభావం గురించి విభిన్న అభిప్రాయాలు ఉండవచ్చు. కానీ బాలికల విద్య అనే అంశాన్ని ప్రపంచవ్యాప్త చర్చలో ముందుకు తీసుకురావడంలో ఆమె పాత్రను విస్మరించడం కష్టం.

విద్య – సమాజ మార్పుకు శక్తి..

చరిత్ర చెబుతున్నది ఏమిటంటే, ఒక దేశ అభివృద్ధి కేవలం భవనాలు, రహదారులు, పరిశ్రమలతో కొలవబడదు. ప్రజల విద్యా స్థాయి, ముఖ్యంగా మహిళల విద్యా స్థాయి, ఆ దేశ భవిష్యత్తును నిర్ణయిస్తుంది.

చదువుకున్న మహిళ..

ఆరోగ్యవంతమైన కుటుంబాన్ని నిర్మిస్తుంది. పిల్లల విద్యను ప్రోత్సహిస్తుంది. ఆర్థిక వ్యవస్థలో భాగస్వామి అవుతుంది. ప్రజాస్వామ్యంలో చురుకుగా పాల్గొంటుంది. సమాజంలో సమానత్వాన్ని బలపరుస్తుంది.

అందువల్ల బాలికల విద్య అనేది సంక్షేమ కార్యక్రమం కాదు. అది సామాజిక న్యాయం, ఆర్థికాభివృద్ధి, ప్రజాస్వామ్య బలోపేతానికి పునాది.

భారతదేశానికి మలాలా కథ చెప్పే పాఠాలు..

భారతదేశం విద్యలో కొంత పురోగతి సాధించినప్పటికీ ఇంకా అనేక సవాళ్లు మిగిలే ఉన్నాయి. ప్రత్యేకంగా గ్రామీణ ప్రాంతాల్లో బాలికల మాధ్యమిక విద్య కొనసాగింపు, బాల్య వివాహాల నిర్మూలన, గిరిజన, వెనుకబడిన వర్గాల బాలికలకు సమాన అవకాశాలు, డిజిటల్ విద్య అందుబాటు, సురక్షితమైన పాఠశాల వాతావరణం లాంటి అంశాలపై నిరంతర కృషి అవసరం.

మలాలా కథ మనకు చెబుతున్నది ఏమిటంటే, విద్యను కాపాడడం అంటే ప్రజాస్వామ్యాన్ని, మానవ గౌరవాన్ని, సమానత్వాన్ని కాపాడటమే.

జూలై 12 – మలాలా దినోత్సవం ఎందుకు?..

ఐక్యరాజ్యసమితి జూలై 12ను మలాలా దినంగా పాటించడం వెనుక ఉద్దేశం ఒక వ్యక్తిని గౌరవించడం కాదు. ఆ రోజు ప్రపంచ దేశాలకు ఒక సందేశం.

ఏ చిన్నారి విద్యకు దూరం కాకూడదు. బాలికలపై వివక్షకు ముగింపు పలకాలి. విద్యలో పెట్టుబడి అంటే శాంతి, అభివృద్ధిలో పెట్టుబడిగా ప్రణాళికలు, నిధుల కేటాయింపులు అవసరం. పుస్తకాలు, ఉపాధ్యాయులు, పాఠశాలలు సమాజాన్ని మార్చగల శక్తి.

మలాలా యూసఫ్‌జాయ్ జీవితం మనకు ఒక ప్రాథమిక సత్యాన్ని గుర్తుచేస్తుంది. తుపాకీ భయాన్ని సృష్టించగలదు, కానీ జ్ఞానాన్ని ఓడించలేదు. ఒక బాలిక చేతిలోని పుస్తకం సమాజ భవిష్యత్తును నిర్మించగలదు.

అయితే మలాలాను కేవలం ఒక “ప్రేరణాత్మక కథ”గా చూడటం సరిపోదు. ఆమె పోరాటం మన ముందుకు తీసుకొచ్చిన అసలు ప్రశ్న ఇప్పటికీ ప్రపంచంలో ఎందుకు కోట్లాది మంది పిల్లలు, ముఖ్యంగా బాలికలు, విద్యకు దూరంగా ఉన్నారు? దానికి ప్రభుత్వాలు సమాధానం చెప్పాలి. తక్షణ పరిష్కార మార్గాలను చేపట్టాలి. తగిన నిధులు కేటాయించాలి.

విద్య అనేది ఖర్చు కాదు. అది నాగరిక సమాజం తన భవిష్యత్తుపై చేసే అత్యంత విలువైన పెట్టుబడి. ఒక బాలిక చదువుకుంటే ఒక కుటుంబం మారుతుంది. లక్షలాది బాలికలు చదువుకుంటే ఒక దేశం మారుతుంది.

మలాలా యూసఫ్‌జాయ్ జీవితం మనకు నేర్పిన గొప్ప పాఠం ఇదే. బుల్లెట్లు శరీరాన్ని గాయపరచగలవు, కానీ ఆలోచనను, విద్యపై ఉన్న ఆకాంక్షను ఓడించలేవు.

About the Author

Telugu staff

Administrator

View All Posts