విశాఖ ఈఎస్‌ఐ ఆసుపత్రిలో నిలిచిన దంత వైద్య సేవలు

విశాఖపట్నం: ఉత్తరాంధ్రలోని విశాఖపట్నం ప్రాంతీయ ఈఎస్‌ఐ ఆసుపత్రిలో దంత వైద్యులు లేకపోవడంతో గత ఏడాది కాలంగా దంత వైద్య సేవలు పూర్తిస్థాయిలో నిలిచిపోయాయి. దీంతో ఈఎస్‌ఐ పరిధిలోని కార్మికులు, ఉద్యోగులు, వారి కుటుంబ సభ్యులు దంత సమస్యలకు చికిత్స పొందలేక తీవ్ర ఇబ్బందులు ఎదుర్కొంటున్నారు.

ప్రైవేట్ ఆసుపత్రుల ఎంపిక జరిగినా..

ఉత్తరాంధ్రలోని శ్రీకాకుళం, విశాఖపట్నం, విజయనగరం జిల్లాల్లో ఈఎస్‌ఐ పరిధిలో దంత వైద్య సేవలను అందించేందుకు ఇటీవల ప్రభుత్వం ప్రైవేట్ దంత ఆసుపత్రులను కూడా ఎంపిక చేసింది.

ఈ నేపథ్యంలో ఈఎస్‌ఐ కార్డుదారులకు ప్రైవేట్ ఆసుపత్రుల ద్వారా వైద్య సేవలు అందించే అవకాశాన్ని ప్రభుత్వం ప్రతిష్ఠాత్మకంగా కల్పించినప్పటికీ, విశాఖపట్నంలోని ప్రాంతీయ ఈఎస్‌ఐ ఆసుపత్రిలో దంత వైద్య విభాగానికి వైద్యులు అందుబాటులో లేకపోవడం ప్రధాన సమస్యగా మారింది.

రోగులకు తప్పని ఆర్థిక భారం

ఏడాది కాలంగా వైద్యులు లేకపోవడంతో ఇతర ప్రాంతాల్లో పనిచేస్తున్న దంత వైద్యులను ఈ ఆసుపత్రికి కనీసం తాత్కాలిక ప్రాతిపదికన నియమించకపోవడం, ప్రత్యామ్నాయంగా బయటి ఆసుపత్రులకు పంపించే సిఫారసు సదుపాయాలు అందుబాటులో లేకపోవడం వల్ల రోగులు తీవ్ర ఇబ్బందులు పడుతున్నారు.

దంత నొప్పులు, చిగుళ్ల వ్యాధులు, దంతాల తొలగింపు, దంత మూల చికిత్స వంటి అవసరాల కోసం వచ్చిన వారు నిరాశతో వెనుదిరుగుతున్నారు.

సకాలంలో చికిత్స అందకపోవడంతో కొందరు ప్రైవేట్ క్లినిక్‌లను ఆశ్రయించి వేలాది రూపాయలు సొంతంగా ఖర్చు చేయాల్సిన దుస్థితి ఏర్పడుతోంది.

కార్మిక సంఘాల ఆందోళన

ఈఎస్‌ఐ పరిధిలోని కార్మికులు, ఉద్యోగులు ప్రతి నెలా తమ వేతనాల నుంచి బీమా చందాలు క్రమం తప్పకుండా చెల్లిస్తున్నప్పటికీ, అవసరమైన సమయంలో ప్రాంతీయ ఆసుపత్రిలో ఏడాది కాలంగా దంత వైద్య సేవలు పూర్తిగా అందుబాటులో లేకపోవడం పట్ల కార్మిక సంఘాలు తీవ్ర ఆందోళన వ్యక్తం చేస్తున్నాయి.

తక్షణమే నియమించాలని విజ్ఞప్తి

విశాఖపట్నం ప్రాంతీయ ఈఎస్‌ఐ ఆసుపత్రిలో వెంటనే అర్హులైన దంత వైద్యులను నియమించాలని కార్మిక సంఘాల ప్రతినిధులు విజ్ఞప్తి చేస్తున్నారు. అప్పటివరకు ప్రత్యామ్నాయంగా ఇతర ప్రాంతాల్లో పనిచేస్తున్న వారిని తాత్కాలిక ప్రాతిపదికన నియమించి, అవసరమైన సిఫారసు సదుపాయాలను కల్పించాలని కోరుతున్నారు.

కార్డుదారులకు నిరంతరాయంగా దంత వైద్య సేవలు అందుబాటులోకి తీసుకువచ్చి, రోగుల ఇబ్బందులను తక్షణమే పరిష్కరించాలని వారు డిమాండ్ చేస్తున్నారు.

About the Author

The Wire Staff

Ppma_guest_author

View All Posts