దాభోల్కర్ కేసు: సీబీఐ దర్యాప్తుపై బాంబే హైకోర్టు అసంతృప్తి

Reading Time: 2 minutes

2013 ఆగస్టు 20న పూణేలోని ఓంకారేశ్వర్ వంతెనపై ఉదయపు నడకకు వెళ్లిన నరేంద్ర దాభోల్కర్‌ను ఇద్దరు మోటార్‌సైకిలిస్టులు కాల్చి చంపారు. మహారాష్ట్ర అంధశ్రద్ధ నిర్మూలన్ సమితి వ్యవస్థాపకుడైన దాభోల్కర్ కేసులో, ప్రాసిక్యూషన్ కేసు విశ్వసనీయత లేని సాక్షులపై ఆధారపడి ఉందని పేర్కొంటూ, హైకోర్టు ఇప్పుడు దోషిగా నిర్ధారించబడిన శరద్ కలస్కర్‌కు బెయిల్ మంజూరు చేసింది.

న్యూఢిల్లీ: హేతువాది డాక్టర్ నరేంద్ర దాభోల్కర్ 2013 హత్య కేసులో దోషిగా తేలిన ఇద్దరు షూటర్లలో ఒకరైన శరద్ కలస్కర్‌కు బాంబే హైకోర్టు 2026 ఏప్రిల్ 29న బెయిల్ మంజూరు చేసింది.

సాక్షుల ద్వారా శరద్ కలస్కర్‌ను గుర్తించడానికి సీబీఐ అనుసరించిన పద్ధతి నిష్పక్షపాతంగా లేదా విశ్వసనీయంగా లేదని కోర్టు సందేహాలు వ్యక్తం చేసింది.

జస్టిస్‌లు అజయ్ గడ్కరీ, రంజిత్‌సింగ్ భోంసాలేలతో కూడిన డివిజన్ బెంచ్, పూణే సెషన్స్ కోర్టు కలస్కర్‌కు విధించిన యావజ్జీవ కారాగార శిక్షపై స్టే విధించి, రూ 50,000 వ్యక్తిగత పూచీకత్తుపై బెయిల్‌పై విడుదల చేయాలని ఆదేశించింది.

హిందూస్తాన్ టైమ్స్ కథనం ప్రకారం, ప్రాసిక్యూషన్ కేసు చాలావరకు విశ్వసనీయత లేని సాక్షులపై ఆధారపడి ఉందని కోర్టు పేర్కొంది.

కలస్కర్ ఎనిమిదేళ్లకు పైగా జైలులో ఉన్న విషయాన్ని కూడా అది పరిగణనలోకి తీసుకుంది. 2024లో ప్రత్యేక న్యాయస్థానం దోషిగా నిర్ధారించిన కలస్కర్, హైకోర్టులో అప్పీల్ దాఖలు చేశారు.

హేతువాది డాక్టర్ నరేంద్ర దాభోల్కర్ హత్య నేపథ్యం..

2013 ఆగస్టు 20న ఉదయం, పూణేలోని వీఆర్ షిండే వంతెనపై 69 ఏళ్ల దాభోల్కర్‌ను సచిన్ ప్రకాశరావు అందూరే, కలస్కర్ కాల్చి చంపారు. ఆయన మహారాష్ట్ర అంధశ్రద్ధ నిర్మూలన్ సమితి వ్యవస్థాపకుడు. మహారాష్ట్ర, కర్ణాటకలలో జరిగిన వరుస హత్యలలో ఇది మొదటిది.

దాభోల్కర్ హత్య తర్వాత, వామపక్ష మేధావి గోవింద్ పన్సారే, విద్యావేత్త- కార్యకర్త ఎంఎం కల్బుర్గి, పాత్రికేయురాలు గౌరీ లంకేష్‌లను కాల్చి చంపారు.

సీబీఐ దర్యాప్తు, నిందితుల అరెస్టుల పర్వం..

మొదట్లో ఆయన హత్య కేసును దర్యాప్తు చేసిన పూణే పోలీసులు, హైకోర్టు ఆదేశం మేరకు 2014లో దర్యాప్తును సీబీఐకి అప్పగించారు.

2013లో దాభోల్కర్ హత్యకు గురైనప్పటికీ, గౌరీ లంకేష్ హత్యలో వారి పాత్ర వెలుగులోకి వచ్చినప్పుడు 2018లో అందూరే, కలస్కర్ ఇద్దరినీ అరెస్టు చేశారు. కర్ణాటక పోలీసుల ప్రత్యేక దర్యాప్తు బృందం(SIT) సహాయంతో మహారాష్ట్ర ఉగ్రవాద నిరోధక దళం(ఏటీఎస్‌) వీరిద్దరినీ పట్టుకుంది.

2017లో బెంగళూరులోని తన నివాసంలో జరిగిన గౌరీ లంకేష్ హత్యపై కర్ణాటక ఎస్‌ఐటీ దర్యాప్తు చేస్తోంది.

2025 జనవరిలో, సుదీర్ఘకాలం కస్టడీలో ఉండాల్సి రావడంతోపాటు సమీప భవిష్యత్తులో విచారణ ముగిసే అవకాశం తక్కువగా ఉండటం వంటి కారణాలతో మరో ఆరుగురు నిందితులు– సచిన్ అందురే, గణేష్ మిస్కిన్, అమిత్ దేగ్వేకర్, అమిత్ బడ్డీ, భరత్ కురానే, వాసుదేవ్ సూర్యవంశీలకు బెయిల్ మంజూరు చేయబడింది.

కలస్కర్ అప్పీలుకు ప్రధాన ఆధారాలు ఏమిటి?..

పత్రిక కథనం ప్రకారం, విచారణ సందర్భంగా కలస్కర్‌కు ప్రాతినిధ్యం వహిస్తున్న సీనియర్ న్యాయవాది నితిన్ ప్రధాన్, న్యాయవాది శుభదా ఖోట్, 2019లో దాఖలు చేసిన తదుపరి ఛార్జిషీట్‌లో “ఎటువంటి సరైన, బలమైన కారణం లేకుండా” అతని పేరును దాడి చేసిన వ్యక్తిగా చేర్చారని వాదించారు.

టెస్ట్ ఐడెంటిఫికేషన్ పరేడ్(టీఐపీ) నిర్వహించలేదని, ఇది భారత సాక్ష్య చట్టం ప్రకారం అతని గుర్తింపు సాక్ష్యం విలువను తగ్గిస్తుందని కూడా వారు అన్నారు.

డిఫెన్స్ వాదన ప్రకారం, అతను అప్పటికే కస్టడీలో ఉన్నప్పుడు సాక్షులకు అతని ఫోటోలు చూపించి, అతన్ని గుర్తించమని బలవంతం చేశారు.

సీబీఐ వాదనలు, కోర్టు తీర్పు..

మరోవైపు, సీబీఐ తరఫున వాదిస్తున్న ప్రత్యేక పబ్లిక్ ప్రాసిక్యూటర్ అమిత్ ముండే, ప్రాసిక్యూషన్ ప్రధానంగా ప్రత్యక్ష సాక్షుల వాంగ్మూలాలపై ఆధారపడిందని పేర్కొంటూ పిటిషన్‌ను వ్యతిరేకించారు. కేవలం ఫోటోల ద్వారా గుర్తించడం వల్ల సాక్ష్యం చెల్లనిది కాదని ఆయన వాదించారు.

“ఫోటోలు చూపిస్తూ టీఐపీ నిర్వహించినప్పటికీ, అది ప్రాసిక్యూషన్ కేసుకు హాని కలిగించదు” అని ఆయన అన్నారు.

లైవ్ లా కథనం ప్రకారం, బెయిల్ ఉత్తర్వుపై నాలుగు వారాల స్టే కోరుతూ సీబీఐ దాఖలు చేసిన దరఖాస్తును కోర్టు తిరస్కరించింది.

జస్టిస్ గడ్కరీ మాట్లాడుతూ, “దాడి చేసిన వ్యక్తిగా దరఖాస్తుదారు కలస్కర్ గుర్తింపుపై మేము ఇప్పటికే సందేహాలు వ్యక్తం చేసినందున, ఉత్తర్వుపై స్టే విధించే ప్రసక్తే లేదు” అని అన్నారు.

హత్య వెనుక కుట్ర..

మూఢనమ్మకాలను సవాలు చేసే, హేతువాదాన్ని ప్రోత్సహించే గొంతులను అణచివేయడమే లక్ష్యంగా జరిగిన కుట్రలో భాగంగానే దాభోల్కర్ హత్య జరిగిందని ప్రాసిక్యూషన్ వాదించింది.

సనాతన్ సంస్థ అనే మితవాద సంస్థతో సంబంధం ఉన్నట్లుగా చెప్పబడుతున్న నిందితులు, మూఢనమ్మకాలకు వ్యతిరేకంగా పనిచేస్తున్న వారిలో భయాన్ని కలిగించడానికి ప్రయత్నించారని ఆరోపణలు ఎదుర్కొంటున్నారు.

2015లో, ఈ కేసును దర్యాప్తు చేయడానికి ఒక స్వతంత్ర ప్రత్యేక దర్యాప్తు బృందాన్ని ఏర్పాటు చేయాలని కోరుతూ దాభోల్కర్ కుటుంబం హైకోర్టులో ఒక పిటిషన్‌ను దాఖలు చేసింది. 2015 ఆగస్టులో హైకోర్టు ఈ దర్యాప్తును పర్యవేక్షించడం ప్రారంభించింది.