‘ఓటు అనేది కేవలం కాగితం మీద ముద్ర కాదు.. పౌరుడి రాజ్యాంగ ఉనికి.’ – ఇదే పదునైన సందేశంతో డిజిటల్ తెరల వెనుక నుంచి నేరుగా వేలాది మంది జనసందోహం మధ్యలోకి వచ్చారు ప్రముఖ పొలిటికల్ కామెంటేటర్ ధ్రువ్ రాఠీ.
బెంగళూరు వీధుల్లో మార్మోగిన “ఓట్ చోర్, గద్దీ ఛోడ్” నినాదాలు అధికార పీఠాల పునాదులను కదిలించాయి.
ఎటువంటి రాజకీయ లబ్ధి లేకుండా, పక్కా ఆధారాలతో ‘ఓట్ల తొలగింపు’ కుట్రలను బయటపెడుతూ ఆయన చేసిన విమర్శలు ప్రతి పౌరుడి గుండెను తాకాయి.
చట్టబద్ధమైన జాగ్రత్తలతో, రాజ్యాంగాన్నే కవచంగా మార్చుకుని ఆయన సాగించిన ఈ పోరాటం-భారత ప్రజాస్వామ్యం ఇంకా బతికే ఉందనడానికి సజీవ సాక్ష్యంగా నిలిచింది.
డిజిటల్ దుర్గం నుంచి రోడ్డుపైకి – చారిత్రాత్మక అడుగు
యూట్యూబ్‌లో కోట్లాది మంది ఆలోచనలను ప్రభావితం చేసిన ధ్రువ్ రాఠీ, మొదటిసారి ప్రత్యక్ష రాజకీయ క్షేత్రంలో అడుగుపెట్టారు.
2026 అక్టోబర్ 8న బెంగళూరులోని ఫ్రీడమ్ పార్క్‌లో కేంద్ర ఎన్నికల సంఘం(ఈసీఐ) ప్రవేశపెట్టిన వివాదాస్పద ‘స్పెషల్ ఇంటెన్సివ్ రివిజన్'(సర్)కు వ్యతిరేకంగా జరిగిన భారీ నిరసన ప్రదర్శనలో ఆయన పాల్గొన్నారు.
కెమెరా ముందు విశ్లేషణలు చెప్పే వ్యక్తి నేరుగా వేలాది మంది జనసందోహం మధ్య మైకు పట్టుకుని నిలబడటం, పాలక బీజేపీ వర్గాల్లోనూ, దేశ రాజకీయాల్లోనూ పెద్ద సంచలనంగా మారింది.
ఇండియా రాకముందే మొదలైన ప్రకంపనాలు
ధ్రువ్ రాఠీ భారతదేశానికి వస్తున్నారనే వార్త సోషల్ మీడియాలో దావానలంలా వ్యాపించడంతోనే పాలకుల్లో గుబులు మొదలైంది.
‘రాజ్యాంగ వ్యవస్థలను కుప్పకూల్చడానికి, విదేశీ శక్తుల మద్దతుతో ప్రభుత్వాన్ని కూల్చడానికి వస్తున్నారు’ అంటూ సోషల్ మీడియా ద్వారా పాత రొటీన్ ట్రోలింగ్ యంత్రాంగం రకరకాల కథనాలను వ్యాప్తి చేయడానికి ప్రయత్నించింది. ఆయన విమానం దిగకముందే, ఆయన పర్యటన చుట్టూ ఒక పెద్ద రాజకీయ ఉత్కంఠను సృష్టించారు.
సోషల్ మీడియా దుష్ప్రచారానికి వేదికపైనే చెక్
బెంగళూరు ఫ్రీడమ్ పార్క్ వేదికపైకి రాగానే, ధ్రువ్ రాఠీ తన తొలి వ్యాఖ్యలతోనే ప్రత్యర్థుల కుట్రలకు చెక్ పెట్టారు.
‘నేను నిన్న విమానం దిగగానే సోషల్ మీడియాలో ఒక వార్త వైరల్ అవ్వడం చూశాను. ధ్రువ్ రాఠీ ప్రభుత్వాన్ని కూల్చడానికి వస్తున్నాడని రాశారు. ప్రధాని నరేంద్ర మోదీ అనుకోవచ్చు- నాకు ఆయనపై ఏమైనా వ్యక్తిగత కోపం ఉందేమోనని. కానీ నిజం ఏమిటంటే, దేశంలోని పౌరులందరికీ ఆయన నిర్ణయాలతో సమస్యలు ఉన్నాయి’ అని స్పష్టం చేశారు.
విదేశీ నిధుల నిందలపై పదునైన సత్యం
తనపై వచ్చే విదేశీ ఫండింగ్ ఆరోపణలను ఆయన ఎంతో చాకచక్యంగా తిప్పికొట్టారు. ‘నాకు ఎలన్ మస్క్ నుంచో, జార్జ్ సోరోస్ నుంచో నిధులు రావడం లేదు. నా సొంత డబ్బులతో విమాన టికెట్ కొనుక్కొని నా దేశానికి, నా ప్రజల హక్కుల కోసం వచ్చాను’ అని చెప్పడం ద్వారా, కుట్ర కోణాలను ప్రచారం చేసే వర్గాలను ఆత్మరక్షణలో పడేశారు.
రాజ్యాంగ బద్ధమైన భాష – కేసులకు దొరకని విమర్శలు
ఈ మొత్తం విమర్శలో అత్యంత ప్రాధాన్యత కలిగిన అంశం ఆయన పాటించిన చట్టబద్ధమైన భాష. సాధారణంగా ప్రభుత్వాలను విమర్శించే క్రమంలో నాయకులు వేసే భావోద్వేగ లేదా చట్టవ్యతిరేక వ్యాఖ్యలను ఆసరాగా చేసుకుని కేసులు నమోదు చేయడం ప్రభుత్వాలకు అలవాటు. కానీ ధ్రువ్ రాఠీ రాజ్యాంగ పరిధిని దాటలేదు, చట్టానికి వ్యతిరేకంగా ఒక్క ముక్క మాట్లాడలేదు.
ప్రతి విమర్శకూ చట్టం, రాజ్యాంగ సూత్రాలు, ఆధారాలనే ప్రాతిపదికగా చేసుకున్నారు.
అధికార పీఠాలకు నిద్రలేకుండా చేసిన ధైర్యం
కేంద్ర బృందాలు లేదా లీగల్ టీమ్‌లు ఆయనపై ఎఫ్‌ఐఆర్ నమోదు చేయడానికి లేదా ఐటీ చట్టాల కింద అరెస్టు చేయడానికి ఏ ఒక్క అవకాశం కూడా దొరకలేదు.
ఎందుకంటే ఆయన ఏ వ్యక్తిని వ్యక్తిగతంగా దూషించలేదు, దేశద్రోహ వ్యాఖ్యలు చేయలేదు. కేవలం రాజ్యాంగం పౌరుడికి ప్రసాదించిన ‘ఆర్టికల్ 19′(స్వేచ్ఛగా మాట్లాడే హక్కు), ‘ఆర్టికల్ 326′(ఓటు హక్కు) ప్రాతిపదికన మాత్రమే ప్రశ్నించారు.
ప్రభుత్వాన్ని మార్చడానికి రాలేదు – ఓటును కాపాడుకోవడానికి వచ్చాను
ఆయన సభలో మాట్లాడుతూ స్పష్టమైన ప్రకటన చేశారు. ‘నేను ఇక్కడ ఎటువంటి ప్రభుత్వాన్ని పడగొట్టడానికి లేదా మార్చడానికి రాలేదు. ప్రతి పౌరుడికి రాజ్యాంగం ఇచ్చిన ప్రాథమిక హక్కైన ‘ఓటు హక్కు’ను రక్షించుకోవడానికి వచ్చాను’ అని వివరించారు.
ఈ ఒక్క మాటతో ఆయనపై కుట్రదారు ముద్ర వేయాలని చూసిన ప్రయత్నాలన్నీ నీటిమూటలయ్యాయి.
బీజేపీ అనుకూల ఓటర్లకు పిలుపు
బీజేపీకి ఓటు వేసే సామాన్య పౌరులను శత్రువులుగా చూడకుండా, వారిని కూడా ఈ ప్రజాస్వామ్య పోరాటంలో భాగస్వాములను చేసేలా మాట్లాడటం ఆయన పరిణతికి నిదర్శనం.
‘మీరు ఏ పార్టీకైనా ఓటేయండి, అది మీ ఇష్టం. కానీ మీ ఓటు ఉందో లేదో చూసుకునే హక్కు, ప్రజాస్వామ్యాన్ని కాపాడుకునే బాధ్యత మనందరిదీ’ అని ఆయన తేల్చి చెప్పారు.
ఓట్ల చోరీపై 3 నిశ్చిత ఆధారాలు – పాలకులకు సవాల్
బీజేపీ ఓటర్లలో చాలామందికి ఓట్ల చోరీ జరుగుతోందన్న నమ్మకం కలగడం లేదని పేర్కొంటూ, ధ్రువ్ రాఠీ సభ ముందుకు 3 కీలక ఆధారాలను ఉంచారు.
వీటిపై చీఫ్ ఎలక్షన్ కమిషనర్ జ్ఞానేష్ కుమార్, ప్రధాని నరేంద్ర మోదీ, హోం మంత్రి అమిత్ షా సమాధానం చెప్పాలని బహిరంగ సవాల్ విసిరారు.
మొదటిది: బెంగాల్‌లో 70 వేల ఓట్ల గారడీ
పశ్చిమ బెంగాల్ ఎన్నికల ముందు ప్రత్యేక సమగ్ర సవరణ(సర్) పేరిట రాత్రికి రాత్రే 70 వేల మంది ఓటర్ల పేర్లను తొలగించారని ధ్రువ్ వెల్లడించారు.
‘వారు అనర్హులు లేదా చనిపోయినవారైతే, ఎన్నికలు ముగిసిన మరుక్షణమే ఆ పేర్లు మళ్లీ ఓటర్ల జాబితాలోకి ఎలా వచ్చాయి? ఎన్నికల సమయంలో మాత్రమే ఆ నిజమైన ఓటర్లను ఎందుకు పక్కనబెట్టారు?’ అని ఆయన నిలదీశారు.
రెండోది: బీహార్‌లో 65 లక్షల ఓట్ల మాయం
బీహార్‌లో ఏకంగా 65 లక్షల మంది ఓటర్ల పేర్లను జాబితా నుంచి తొలగించారని, ఆ సమాచారాన్ని ప్రజలకు తెలియజేయకుండా జ్ఞానేష్ కుమార్ దాచిపెట్టారని ఆరోపించారు.
చివరకు సుప్రీంకోర్టు జోక్యం చేసుకుని ఆదేశాలు ఇచ్చేంత వరకు డేటాను బయటపెట్టకపోవడంపై మండిపడుతూ, ‘ఇది పారదర్శకత శూన్యం, జవాబుదారీతనం శూన్యం’ అని ఎండగట్టారు.
మూడోది: యూపీలో 14 లక్షల పేర్ల అనుమానాస్పద చేర్పు
ఉత్తరప్రదేశ్‌లో అకస్మాత్తుగా 14 లక్షల మంది ఓటర్ల పేర్లను జాబితాలో చేర్చిన తీరుపై ‘రిపోర్టర్స్ కలెక్టివ్’ వెలుగులోకి తెచ్చిన కథనాన్ని ఆయన గుర్తుచేశారు.
ఎవరి పేర్లు చేరుస్తున్నారో చెప్పరు, ఎవరి పేర్లు తీసేస్తున్నారో వెల్లడించరు. గోవాలో కూడా సాఫ్ట్‌వేర్ సాంకేతిక సమస్యల నెపంతో అర్హులైన 100 మంది ఓటర్లను దూరంగా పెట్టారని, ఓటరు జాబితాలు నియంత్రణ కోల్పోయి నడుస్తున్నాయని ఆందోళన వ్యక్తం చేశారు.
క్షేత్రస్థాయి బాధితులను వేదికపైకి తెచ్చిన కర్ణాటక పౌర సమాజం
నటుడు ప్రకాష్ రాజ్ ఆహ్వానాన్ని, కర్ణాటక పౌర సమాజ శ్రమను ధ్రువ్ రాఠీ కొనియాడారు.
గత పది రోజులుగా వివిధ జిల్లాల్లో పర్యటించి ఓటు హక్కు కోల్పోయిన బాధితులను, ‘చనిపోయారంటూ’ జాబితా నుంచి తీసేసిన సజీవ పౌరులను వెతికి పట్టుకుని నిరసన వేదిక ముందుకు తెచ్చిన పౌర సమాజం కృషిని అభినందించారు.
మారుమోగిన ‘ఓట్ చోర్’ నినాదం – ఫ్రీడమ్ పార్క్‌లో చెలరేగిన ప్రజాగ్రహం
బాధితులు సాక్ష్యాలుగా నిలబడ్డ ఈ వేదికపై నుంచి, ప్రజాస్వామ్య హక్కులను కాలరాస్తున్న అధికారుల తీరుపై ధ్రువ్ రాఠీ గొంతు కలిపారు.
‘ఓట్ చోర్, గద్దీ చోడ్’(ఓట్లను దొంగిలించేవారా.. పదవులను వీడండి) అంటూ ఆయన ఇచ్చిన నినాదాలు బెంగళూరు వీధుల్లో ప్రతిధ్వనించాయి.
బాధ్యతారాహిత్యంగా వ్యవహరిస్తున్న సీఈసీ జ్ఞానేష్ కుమార్ తక్షణమే రాజీనామా చేయాలని డిమాండ్ చేశారు.
దేశభక్తులు వర్సెస్ దేశద్రోహులు
సభలో ఉన్న ప్రజలను ఉద్దేశించి ఆయన భావోద్వేగంతో మాట్లాడారు. ‘హక్కుల కోసం ఇక్కడికి వచ్చిన మీకంటే గొప్ప దేశభక్తులు మరెవరూ లేరు. కానీ, రాజ్యాంగాన్ని కాలరాస్తున్న జ్ఞానేశ్ కుమార్‌ను ఇంకా కాపాడుతున్నవారి కంటే గొప్ప దేశద్రోహులు మరెవరూ లేరు’ అని తేల్చిచెప్పారు.
ప్రముఖుల మద్దతు – ప్రజా వేదిక విస్తరణ
సిటిజన్స్ జస్టిస్ ప్లాట్‌ఫామ్(సీజేపీ), కాక్‌రోచ్ జనతా పార్టీ సంయుక్తంగా నిర్వహించిన ఈ కార్యక్రమంలో ధ్రువ్ రాఠీతో పాటు ప్రఖ్యాత నటుడు ప్రకాష్ రాజ్, ఫ్యాక్ట్-చెకర్ మహమ్మద్ జుబేర్, సామాజిక విశ్లేషకులు పరకాల ప్రభాకర్, యాక్టివిస్ట్ అభిజీత్ దిప్కే తదితరులు పాల్గొన్నారు.
ఓట్ల తొలగింపును ‘పౌరుల ఆత్మగౌరవంపై జరుగుతున్న దాడి’గా వీరంతా అభివర్ణించారు.
డిజిటల్ పరదా నుంచి ప్రత్యక్ష పోరాటానికి
యూట్యూబ్‌లో వందల మిలియన్ల వ్యూస్ సాధించే ఒక కంటెంట్ క్రియేటర్, వ్యూస్, సబ్‌స్క్రైబర్ల పరిధి దాటి నేరుగా రోడ్డుపైకి వచ్చి పోరాటంలో భాగస్వామి కావడం భారతీయ డిజిటల్ మీడియా చరిత్రలో ఒక కీలక మలుపు.
గతంలో ‘భారతదేశం నియంతృత్వ దేశంగా మారుతోందా?’ వంటి వీడియోలతో కోట్లాది మందిని ఆలోచింపజేసిన ధ్రువ్, ఇప్పుడు ఆ ఆలోచనలను కార్యాచరణగా మార్చారు.
అధికార వర్గాల్లో పెరిగిన కలవరం
ధ్రువ్ రాఠీ ఇండియా రాక, ఆయన సభలకు వస్తున్న విపరీతమైన స్పందన బీజేపీ అగ్రనాయకత్వానికి పెద్ద తలనొప్పిగా మారింది.
గోదీ మీడియాలోని ప్రచార ఆర్భాటాలను అధిగమించి, నేరుగా యువతరం మనస్సుల్లోకి ధ్రువ్ రాఠీ ప్రసంగాలు తూటాల్లా దూసుకెళ్తుండటంతో, దీనిని ఎలా ఎదుర్కోవాలో తెలియక అధికార పార్టీ డిజిటల్ విభాగాలు సతమతమవుతున్నాయి.
ప్రజాస్వామ్య పరిరక్షణ బాధ్యత
‘ఒక రోజు వస్తుంది… భారత్ మాతాకీ జై.’ అంటూ ధ్రువ్ రాఠీ ముగించిన ముగింపు ప్రసంగం సభలో సరికొత్త ఊపిరి నింపింది.
డిజిటల్ తెరలను దాటుకుని వీధుల్లోకి వచ్చిన ఆయన గొంతుక, భారత ప్రజాస్వామ్యం ఇంకా సజీవంగానే ఉందనడానికి నిదర్శనం.
రాజ్యాంగాన్ని ఆయుధంగా మార్చుకుని, చట్టం పరిధిలోనే ఉంటూ ప్రభుత్వాన్ని నిలదీసే ఈ విధానం దేశవ్యాప్తంగా పౌర సమాజంలో కొత్త ఉత్తేజాన్ని నింపింది. రాజ్యాంగం ప్రసాదించిన ఓటు హక్కును కాపాడుకోవడమే పౌరుల ప్రథమ కర్తవ్యమని బెంగళూరు నిరసన చాటిచెప్పింది.
About the Author
Discover more from The Wire Telugu
Subscribe to get the latest posts sent to your email.
