ప్రముఖ సంఘ సంస్కర్త పెరియార్ ఈవీ రామసామి..

కులవివక్షకు వ్యతిరేకంగా స్వాభిమానం, హేతువాదం, సామాజిక సమానత్వం కోసం జీవితాంతం పోరాడిన మహానీయుడు రామసామి.

సెప్టెంబర్ 17 పెరియార్ జయంతి. భారతదేశ సామాజిక చరిత్రలో రాజకీయ స్వాతంత్ర్యంతో పాటు సామాజిక స్వాతంత్ర్యం, సమానత్వం, స్వాభిమానం కోసం నిరంతరం పోరాడిన ప్రముఖ సంస్కర్తలలో ఈరోడ్ వెంకటప్ప రామసామి ఒకరు. ఆయనను ప్రజలు ప్రేమతో “పెరియార్” అని పిలిచారు.

తమిళంలో “పెరియార్” అంటే “గొప్ప వ్యక్తి/గౌరవనీయ పెద్ద” అని అర్థం. పెరియార్ 1879 సెప్టెంబర్ 17న తమిళనాడులోని ఈరోడ్‌లో జన్మించారు. 1973 డిసెంబర్ 24న ఆయన మరణించారు. ఆయన జీవితకాలం 94 సంవత్సరాలు.

ఇరవయ్యవ శతాబ్దపు తొలి దశాబ్దాల్లో భారత సమాజంలో కులం, అంటరానితనం, లింగ అసమానత, మూఢనమ్మకాలు, సామాజిక ఆధిపత్యం బలంగా ఉన్న సమయంలో పెరియార్ వాటిని ప్రశ్నించారు.

“మనిషి పుట్టుకతో ఎవరూ ఉన్నతులు కాదు-ఎవరూ తక్కువవారు కాదు” అనే సమానత్వ భావన ఆయన ఆలోచనలకు కేంద్ర బిందువుగా నిలిచింది.

బాల్యం, కుటుంబ నేపథ్యం..

పెరియార్ ఈరోడ్‌లో వెంకటప్ప నాయకర్, చిన్న తాయమ్మ దంపతులకు జన్మించారు. ఆయన కుటుంబం ఆర్థికంగా సుసంపన్నమైన వ్యాపార కుటుంబం. చిన్న వయసులోనే పాఠశాల విద్యను విడిచిపెట్టి కుటుంబ వ్యాపారంలో చేరారు.

అయితే సంపద, సామాజిక స్థానం ఉన్నప్పటికీ ఆయన జీవితాన్ని కేవలం వ్యక్తిగత ఆర్థికాభివృద్ధికే పరిమితం చేయలేదు.

సమాజంలో ఉన్న అసమానతలు, కులవివక్ష, మతపరమైన ఆచారాల్లోని వివక్ష ఆయనను తీవ్రంగా ఆలోచింపజేశాయి.

యువకుడిగా ఉత్తర భారతదేశంలోని కొన్ని తీర్థయాత్రా కేంద్రాలను సందర్శించినప్పుడు కుల ఆధారంగా మనుషుల మధ్య జరుగుతున్న వివక్షను ఆయన గమనించారు. ఈ అనుభవాలు తరువాత ఆయన సామాజిక ఆలోచనలపై ప్రభావం చూపాయి.

పెరియార్ మొదట స్థానిక ప్రజా కార్యక్రమాలలో చురుకుగా పాల్గొన్నారు. ఈరోడ్ మున్సిపాలిటీకి అధ్యక్షుడిగా కూడా పనిచేశారు. ప్రజా సమస్యలు, పారిశుధ్యం, మద్యపాన నిషేధం, సామాజిక సేవ వంటి విషయాలపై ఆయన విశేషంగా కృషి చేశారు.

తరువాత ఆయన భారత జాతీయ కాంగ్రెస్‌లో చేరారు. స్వాతంత్య్రోద్యమంలో భాగంగా సహాయ నిరాకరణ, విదేశీ వస్త్రాల బహిష్కరణ, మద్యనిషేధం వంటి కార్యక్రమాలలో పాల్గొన్నారు.

మద్యం దుకాణాల నిరసనలో ఆయన భార్య నాగమ్మై, సోదరి కన్నమ్మాళ్ కూడా పాల్గొన్నారు. కాంగ్రెస్‌లో ఉన్న సమయంలోనే సామాజిక సమానత్వం, రాజకీయ స్వాతంత్ర్యం మధ్య ఉన్న అంతరాన్ని ఆయన ప్రశ్నించడం ప్రారంభించారు.

కుల వివక్షకు వ్యతిరేకంగా పోరాటం..

పెరియార్ ఆలోచనల్లో ప్రధానమైనది కుల వ్యవస్థ నిర్మూలన. కులం కేవలం సామాజిక గుర్తింపు కాదని ఆయన భావించారు. అది మనుషుల మధ్య ఉన్నత–నీచ భేదాలను సుస్థిరం చేస్తుంది.

అంటరానితనం, దేవాలయ ప్రవేశ నిషేధం, విద్యా అవకాశాల్లో అసమానత, ప్రభుత్వ ఉద్యోగాల్లో అసమాన ప్రాతినిధ్యం వంటి అంశాలకు వ్యతిరేకంగా ఆయన పోరాడారు.

కులం పేరుతో ఒక వ్యక్తి మరొక వ్యక్తిని తక్కువగా చూడటం మానవ గౌరవానికి విరుద్ధమని ఆయన వాదించారు.

వైకోం సత్యాగ్రహం – వైకోం వీరర్..

పెరియార్ జీవితంలో అత్యంత ముఖ్యమైన అధ్యాయాలలో వైకోం సత్యాగ్రహం ఒకటి. 1924లో ప్రస్తుత కేరళలోని వైకోంలో ఒక దేవాలయం చుట్టూ ఉన్న రహదారులపై దిగువ కులాల ప్రజలకు ప్రవేశం నిరాకరించడాన్ని వ్యతిరేకిస్తూ ఉద్యమం ప్రారంభమైంది. పెరియార్ ఈ ఉద్యమంలో పాల్గొన్నారు. ప్రభుత్వం ఆయనను అరెస్ట్ చేసింది.

ఈ పోరాటం తరువాత ఆయనకు “వైకోం వీరర్” అనే బిరుదు వచ్చింది. ఈ ఉద్యమం ప్రజా రహదారిపై నడిచే హక్కు కులం ఆధారంగా నిర్ణయించబడకూడదు అనే ముఖ్యమైన అంశాన్ని వెలుగులోకి తెచ్చింది.

కాంగ్రెస్ నుంచి వైదొలగడం..

కుల ప్రాతిపదికన ఉన్న సామాజిక అసమానతలకు వ్యతిరేకంగా చర్యలు తీసుకోవాలని పెరియార్ కాంగ్రెస్‌లో పట్టుబట్టారు. విద్య, ఉద్యోగాల్లో సామాజికంగా వెనుకబడిన వర్గాలకు తగిన ప్రాతినిధ్యం కల్పించాలనే అంశాన్ని ఆయన ప్రధానంగా ముందుకు తెచ్చారు.

అయితే కాంగ్రెస్ సక్రమంగా స్పందించని కారణంగా పెరియార్ 1925లో కాంగ్రెస్ నుండి బయటకు వచ్చారు. ఆ తర్వాత ఆయన ప్రధానంగా సామాజిక సంస్కరణలపై కేంద్రీకరించి పని చేశారు.

స్వాభిమాన ఉద్యమం..

1925లో పెరియార్ నాయకత్వంలో స్వాభిమాన ఉద్యమం బలమైన ఉద్యమంగా రూపుదిద్దుకుంది. కుల అసమానత, అంటరానితనం నిర్మూలన, మహిళలకు సమాన హక్కులు, మూఢనమ్మకాల వ్యతిరేకత, వ్యక్తిగత స్వేచ్ఛ, స్వాభిమానం, సమాన వివాహ హక్కులు, విద్యకు సమాన అవకాశాలు, సామాజికంగా వెనుకబడిన వర్గాలకు ప్రాతినిధ్యం అంశాలు ఈ ఉద్యమం ప్రధాన లక్ష్యాలు.

“మనిషి తన పుట్టుకను ఎంచుకోలేడు. కాబట్టి పుట్టుక ఆధారంగా అతని గౌరవం లేదా హక్కులను నిర్ణయించడం అన్యాయం” అనే భావన స్వాభిమాన ఉద్యమానికి కేంద్ర బిందువుగా నిలిచింది.

స్వాభిమాన వివాహాలు..

మహిళా స్వేచ్ఛను కేవలం సిద్ధాంతంగా కాకుండా ఆచరణలోకి తీసుకురావడానికి పెరియార్ కృషి చేశారు. ఆయన నడిపిన స్వాభిమాన వివాహాల్లో కుల పెద్దలు లేదా పూజారులకు బదులుగా వధూవరుల సమ్మతి, సమానత్వం, స్వాభిమానం ప్రధానంగా ఉండేవి.

వివాహంలో కట్నం, కుల భేదం, పితృస్వామ్య ఆచారాలు వంటి వాటిని ఆయన తీవ్రంగా దుయ్యబట్టారు. ఈ ఆలోచనలు తరువాత తమిళనాడులో వివాహ చట్టాలు, సామాజిక ఆచారాలపై కూడా ప్రభావం చూపాయి.

మహిళా విముక్తి పట్ల పెరియార్ దృక్పథం..

పెరియార్ మహిళా విముక్తికి ప్రత్యేక ప్రాధాన్యతనిచ్చారు. మహిళలకు విద్య, ఆస్తి హక్కు, వివాహంలో స్వేచ్ఛ, విడాకుల హక్కు, వితంతువుల పునర్వివాహం, బాల్య వివాహాల వ్యతిరేకత, కట్న వ్యతిరేకత, గర్భ నిరోధకంపై అవగాహన, పురుషులతో సమానంగా సమాజంలో స్థానం వంటి అంశాలకు ఆయన మద్దతు ఇచ్చారు. ఆ కాలానికి ఇవి చాలా ముందుచూపుతో కూడిన అభిప్రాయాలు.

నేటికీ ఈ దురాచారాలు అమలు జరుగుతూనే ఉన్నాయి. స్త్రీని కేవలం భార్యగా లేదా తల్లిగా మాత్రమే చూడటం ఆమె వ్యక్తిత్వాన్ని తక్కువ చేయడమేనని పెరియార్ భావించారు.

మహిళకు స్వతంత్ర వ్యక్తిత్వం, నిర్ణయాధికారం, ఆర్థిక స్వాతంత్ర్యం ఉండాలని ఆయన బలంగా వాదించారు.

హేతువాదం..

పెరియార్ ఉద్యమంలో హేతువాదం మరో ప్రధాన అంశం. ఆయన ఏ నమ్మకాన్నైనా ప్రశ్నించకుండా అంగీకరించకూడదని, కారణం, ఆధారం, తర్కం ఆధారంగా ఆలోచించాలని ప్రచారం చేశారు. మతాన్ని, దేవుడి భావనను, పురాణాలను, ఆచారాలను ఆయన తీవ్రంగా ప్రశ్నించారు.

కేవలం మత వ్యతిరేకతగా మాత్రమే కాకుండా మనిషి తన బుద్ధిని స్వేచ్ఛగా ఉపయోగించుకోవాలి అనే తాత్విక దృక్పథం ఆయన ఉద్యమంలోని ప్రధాన అంశం. అయితే ఆయన మతం, దేవుడిపై చేసిన వ్యాఖ్యలు అప్పుడు, ఇప్పుడు కూడా వివాదాస్పద చర్చలకు కారణమవుతున్నాయి.

కుడి అరసు – ప్రజా ప్రచారం..

ప్రజలలో తన ఆలోచనలను ప్రచారం చేయడానికి ఆయన పత్రికలు, పుస్తకాలు, ప్రసంగాలను సాధనాలుగా ఉపయోగించుకున్నారు. ఆయన ఆలోచనలను విస్తృతంగా ప్రజల్లోకి తీసుకెళ్లిన ముఖ్యమైన ప్రచురణల్లో 1925లో ప్రారంభమైన “కుడి అరసు” ఒకటి. తరువాత ఆంగ్లంలో “రివోల్ట్” వంటి ప్రచురణలు కూడా వచ్చాయి. ఆయన రచనలు, ప్రసంగాలు సాధారణ ప్రజలను సామాజిక అంశాలపై ఆలోచింపజేయడమే లక్ష్యంగా సాగాయి.

జస్టిస్ పార్టీ, ద్రావిడర్ కజగం..

జస్టిస్ పార్టీతో పెరియార్ సన్నిహితంగా కలసి పనిచేశారు. బ్రాహ్మణేతర వర్గాలకు ప్రభుత్వ ఉద్యోగాలు, విద్యలో ప్రాతినిధ్యం కల్పించడం వంటి అంశాలు జస్టిస్ పార్టీ రాజకీయాల్లో బాగా ప్రాచుర్యం పొందాయి. 1944లో జస్టిస్ పార్టీ ద్రావిడర్ కజగంగా మారింది.

పెరియార్ దాని ప్రధాన నాయకుడు అయ్యారు. ఆ తరువాత ద్రావిడ ఉద్యమం తమిళనాడు రాజకీయాలను బాగా ప్రభావితం చేసింది.

హిందీ వ్యతిరేక ఉద్యమాలు..

తమిళనాడులో హిందీని తప్పనిసరి చేయాలనే ప్రయత్నాలను పెరియార్ వ్యతిరేకించారు.

భాషా విధానంలో ఒక భాషను మరొక భాషపై ఆధిపత్యానికి ఉపయోగించకూడదని ఆయన నొక్కి చెప్పారు. తమిళ భాష, సంస్కృతి, ప్రాంతీయ స్వాభిమానాన్ని కాపాడాలని ఆయన డిమాండ్ చేశారు.

ఈ భాషా ఉద్యమాలు తరువాత తమిళనాడు రాజకీయాలపై గణనీయమైన ప్రభావాన్ని చూపాయి.

సామాజిక న్యాయం – రిజర్వేషన్లు..

పెరియార్ ఉద్యమంలోని మరో ముఖ్యమైన అంశం సామాజిక న్యాయం. సమాజంలో చారిత్రకంగా వెనుకబడిన వర్గాలకు విద్య, ఉద్యోగాలు, రాజకీయ వ్యవస్థలలో తగిన ప్రాతినిధ్యం అవసరమని ఆయన వాదించారు.

ఇది కేవలం వ్యక్తిగత ప్రతిభకు సంబంధించిన ప్రశ్న కాదని, శతాబ్దాలుగా కొనసాగిన సామాజిక అసమానతలను సరిచేయడానికి ప్రభుత్వం చర్యలు తీసుకోవాల్సిన అవసరం ఉందని ఆయన అభిప్రాయపడ్డారు.

తమిళనాడులో తరువాత అభివృద్ధి చెందిన సామాజిక న్యాయ రాజకీయాలకు ఈ ఆలోచనలే ముఖ్యమైన సిద్ధాంత నేపథ్యం అయ్యాయి.

స్వాతంత్ర్యం – పెరియార్..

పెరియార్ బ్రిటిష్ వలస పాలనను వ్యతిరేకించారు. అయితే “రాజకీయ స్వాతంత్ర్యం మాత్రమే సరిపోదు. బ్రిటిష్ పాలకులు వెళ్లిపోయిన తరువాత కూడా కుల వివక్ష, అంటరానితనం కొనసాగితే, మహిళలకు సమాన హక్కులు లేకపోతే, సామాజికంగా అగ్ర వర్ణాల ఆధిపత్యం కొనసాగితే, సాధారణ ప్రజలకు సంపూర్ణ స్వేచ్ఛ వచ్చినట్లు ఎలా చెప్పగలం?” అని ఆయన ప్రశ్నించారు.

రాజకీయ స్వాతంత్ర్యం ఎంత ముఖ్యమూ సామాజిక స్వాతంత్ర్యం అంతే ముఖ్యమైనదని ఆయన గాఢంగా విశ్వసించారు.

ఎన్నికల రాజకీయాల్లో అధికారాన్ని చేపట్టడం కంటే ఆయన సామాజిక మార్పుకు ఎక్కువ ప్రాధాన్యం ఇచ్చారు. తర్వాతి కాలంలో ఆయన ఆలోచనలు ద్రావిడ రాజకీయాలపై విస్తృత ప్రభావాన్ని చూపాయి. ప్రత్యేకంగా సామాజిక న్యాయం, రిజర్వేషన్లు, కుల ఆధిపత్య వ్యతిరేకత, తమిళ భాషా హక్కులు, మహిళా హక్కులు, హేతువాదం, సంక్షేమం వంటి అంశాలు తమిళనాడు రాజకీయ, సామాజిక జీవితంలో ప్రముఖ స్థానాన్ని ఆక్రమించాయి.

పెరియార్ ప్రభావం కేవలం తమిళనాడుకే పరిమితం కాలేదు. స్వాభిమానం, కుల నిర్మూలన, మహిళా సమానత్వం, హేతువాదం వంటి ఆయన ఆలోచనలు దక్షిణ భారతదేశంలోని సామాజిక సంస్కరణ చర్చలపై ప్రభావం చూపాయి.

ప్రత్యేకంగా కులం ఆధారంగా మనిషి విలువను నిర్ణయించకూడదు అనే అంశం భారతదేశంలో సామాజిక న్యాయ ఉద్యమాలకు సంబంధించిన విస్తృత చర్చలో భాగమైంది.

పెరియార్ 24 డిసెంబర్ 1973న మరణించారు. అప్పటికి ఆయన వయస్సు 94 సంవత్సరాలు. పెరియార్ మరణించి ఐదు దశాబ్దాలకు పైగా గడిచినా కుల వివక్ష, లింగ అసమానత, మూఢనమ్మకాలు, సామాజిక వివక్ష, విద్యా–ఉద్యోగ అవకాశాల్లో అసమానత వంటివి నేటికీ కొనసాగుతున్నాయి.

About the Author

The Wire Staff

Ppma_guest_author

View All Posts