ఎక్కువ మందిని సమీకరించడం, మన కోసం, సమాజం కోసం పోరాడి జైళ్లలో మగ్గుతున్న వారిని బయటికి తీసుకురావాల్సిన బాధ్యత అందరిపై ఉందనే ప్రధాన ఆలోచనతో విజయవాడలో ప్రజాస్వామ్యం గొంతు విప్పింది.
‘రాజకీయ ఖైదీల విడుదల కోసం మాట్లాడుదాం’ అనే పిలుపుతో ‘రాజకీయ ఖైదీల విడుదల ఐక్యవేదిక(ఆంధ్రప్రదేశ్)’ ఆధ్వర్యంలో బందర్ రోడ్డులోని రాఘవయ్య పార్క్ సమీపంలోని బాలోత్సవ్ భవన్లో నిర్వహించిన సభకు అనూహ్య స్పందన లభించింది.
న్యాయవాది, ఏపీసీఎల్సీ రాష్ట్ర ప్రధాన కార్యదర్శి చిలుకా చంద్రశేఖర్ అధ్యక్షతన కిక్కిరిసిన హాలులో ప్రముఖ న్యాయవాది, ఇండియన్ లాయర్స్ అసోసియేషన్ వైస్ ప్రెసిడెంట్, బార్ కౌన్సిల్ సభ్యుడు సుంకర రాజేంద్రప్రసాద్ చేసిన ఉత్తేజభరితమైన ప్రసంగం సభను, న్యాయవాద వర్గాలను తీవ్రంగా ఆలోచింపజేసింది.
సమాజంలో బలమైన ఆలోచనను, చైతన్యాన్ని తీసుకురాగలిగితే అవి న్యాయమూర్తుల తీర్పులపై, వ్యవస్థలపై ఏ విధంగా ప్రభావం చూపుతాయో ఇటీవల జరిగిన కొన్ని సంఘటనలు స్పష్టం చేస్తున్నాయని తన ప్రధాన సందేశంలో ఆయన ఉద్ఘాటించారు.
ప్రజాస్వామ్య హక్కులపై ప్రభుత్వాల ఉక్కుపాదం..
కేవలం కొద్దిమంది మాత్రమే ఉన్న హక్కుల కార్యకర్తలను చూసి ప్రభుత్వం ఎందుకు అంతగా భయపడుతోందో ప్రస్తుత పరిణామాలు తేటతెల్లం చేస్తున్నాయని సుంకర రాజేంద్రప్రసాద్ ఎత్తిచూపారు.
ధర్నా చౌక్లో నిరసన తెలపడానికి అనుమతి నిరాకరించడం వెనుక పాలకుల భయమే దాగి ఉందన్నారు. వినాయక నిమజ్జనం, తిరుపతి బ్రహ్మోత్సవాల కారణంగా పోలీసు బలగాలు లేవని ప్రభుత్వం చెబుతున్న సాకులను ఆయన తీవ్రంగా ఖండించారు.
ప్రజాస్వామ్య హక్కులకు మంగళహారతి పడుతూ, ప్రజాస్వామ్యాన్నే నిమజ్జనం చేయడానికి ప్రభుత్వం పూనుకుందే తప్ప, వినాయకుడిని కాదని ఆయన పదునైన వ్యాఖ్యలతో పాలకులను నిలదీశారు.
రాజకీయ ఖైదీల విషయంలో పాలకుల దృష్టికోణానికి, రాజ్యాంగ దృష్టికోణానికి నడుమ ఉన్న వైరుధ్యాన్ని ఆయన స్పష్టంగా వివరించారు.
బిల్కిస్ బానో కేసులో గర్భిణీ అని కూడా చూడకుండా అత్యాచారాలకు, దారుణ హత్యలకు పాల్పడిన క్రూరమైన నేరస్థులను సత్ప్రవర్తన పేరిట విడుదల చేస్తూ పాలకులు వారిని రాజకీయ ఖైదీలుగా పరిగణిస్తున్నారని ఆవేదన వ్యక్తం చేశారు. కానీ, సమాజంలో దోపిడీకి వ్యతిరేకంగా, పర్యావరణ పరిరక్షణ కోసం, ప్రజల హక్కుల కోసం పోరాడే పౌరులను మాత్రం ప్రభుత్వం ఉగ్రవాదులుగా, అర్బన్ నక్సల్స్గా, దిమాగీ నక్సలైట్లుగా ముద్ర వేసి జైళ్లలో పెడుతోందని దుయ్యబట్టారు.
నాడు జేపీ.. నేడు హక్కుల నేతలు..
దేశంలో ప్రజాస్వామ్య వ్యవస్థల రక్షణ కోసం గతంలో జరిగిన పోరాటాలను గుర్తుచేస్తూ ఆయన ఒక చారిత్రక ఘట్టాన్ని ఆవిష్కరించారు.
ఎమర్జెన్సీ కాలంలో లోక్నాయక్ జయప్రకాశ్ నారాయణ్ జైలుకు వెళ్లినప్పుడు ‘భారత ప్రజాస్వామ్యంపై కొట్టిన ప్రతి మేకు, నా హృదయంపై కుట్టిన మేకే’ అని రాసుకున్న విషయాన్ని ప్రస్తావించారు.
ప్రధాని మోదీ సైతం జేపీ పోరాటాన్ని కొనియాడారని చెబుతూ, ఒకవేళ ఈనాడు జేపీ జీవించి ఉంటే ప్రస్తుత పరిణామాలను చూసి ఆయన గుండె ఏ విధంగా తీవ్రంగా గాయపడేదో ఆలోచించాలని కోరారు.
ప్రజల కోసం నిలబడే వారిని విచక్షణ రహితంగా జైళ్లలో కుక్కడం ఏ ప్రజాస్వామ్య పరిరక్షణో చెప్పాలని డిమాండ్ చేశారు.
తాము ఏనాడూ నేరస్థుల విడుదల కోరడం లేదని, ప్రజా సంక్షేమం కోసం పనిచేస్తున్న నిస్వార్థ వ్యక్తుల విడుదల కోసమే గొంతు విప్పుతున్నామని రాజేంద్రప్రసాద్ తేల్చి చెప్పారు.
సుదీర్ఘ కాలం ఆదివాసీల హక్కుల కోసం, వారి సంక్షేమం కోసం పోరాడిన వయోవృద్ధుడు స్టాన్ స్వామిని ఉగ్రవాదిగా ముద్రవేసి జైల్లోనే మరణించేలా చేశారని ఆవేదన వ్యక్తం చేశారు.
అదేవిధంగా సుధా భరద్వాజ్, వరవరరావు వంటి వారిపై పెట్టిన తప్పుడు కేసులను, బాంబే ప్రెస్ క్లబ్లో సమావేశమయ్యారనే చిన్న నెపంతో బెయిల్ రద్దు చేయాలని కోరిన తీరును న్యాయస్థానాలు సైతం తప్పుపట్టిన విధానాన్ని ఆయన సభ దృష్టికి తీసుకువచ్చారు.
ప్రజా చైతన్యంతోనే న్యాయస్థానాల్లోనూ స్పందన..
న్యాయస్థానాలు, న్యాయమూర్తులు కూడా కొన్ని సందర్భాల్లో రాజ్యాంగం కల్పించిన ప్రాథమిక హక్కులను కాపాడటంలో వెనుకబడిపోతున్నారనే చేదు నిజాన్ని ఆయన ధైర్యంగా వెల్లడించారు.
ఢిల్లీ జంతర్ మంతర్ వద్ద విద్యార్థులు, పౌరుల ఆందోళనల సమయంలో దేశంలో జరుగుతున్న హింసను చూడటానికి సమయం లేదని వ్యాఖ్యానించిన ఉన్నత న్యాయస్థానం, ఆ తర్వాత ప్రజా చైతన్యం, సమాజం నుంచి వచ్చిన బలమైన ఒత్తిడి కారణంగానే విద్యార్థులపై నమోదైన కేసులను ఉపసంహరించుకోవాలని ఆదేశించిందని గుర్తుచేశారు.
ప్రజల్లో వచ్చే ఐక్యత, ఆలోచనా దృక్పథం ఎంతటి మార్పునైనా తీసుకురాగలవని ఈ ఉదాహరణ నిరూపిస్తోందని ఉద్ఘాటించారు.
న్యాయవాదిగా తన నలభైయేళ్ల అనుభవంలో సుప్రీంకోర్టు ఒకేసారి వరుస కేసులను రద్దు చేయాలని చెప్పడం ఎప్పుడూ చూడలేదని, అది కేవలం ప్రజా ఉద్యమాలు సమాజంలో తెచ్చిన స్పందన వల్లే సాధ్యమైందని స్పష్టం చేశారు.
రక్తపాతం, హింస, ప్రజల మానసిక పరిస్థితిపై పడుతున్న ప్రభావాన్ని ప్రజాక్షేత్రం ద్వారా న్యాయవ్యవస్థ దృష్టికి బలంగా తీసుకెళ్లగలిగామని ఆయన చెప్పారు.
ఈ పరిణామాలు పౌర సమాజానికి ఒక పెద్ద పాఠమని, ప్రజాభిప్రాయం బలంగా మారినప్పుడు వ్యవస్థలు కూడా లొంగక తప్పదని ఆయన పేర్కొన్నారు.
“మన లక్ష్యం కేవలం న్యాయం కోసం గొంతు ఎత్తడమే కాదని, బాధితులకు కచ్చితంగా న్యాయం జరిగేలా చూడటమేన”ని రాజేంద్రప్రసాద్ పిలుపునిచ్చారు.
రాజ్యాంగబద్ధమైన హక్కుల పరిరక్షణకు, జైళ్లలో మగ్గుతున్న నిజమైన ప్రజా సేవకుల విడుదల కోసం న్యాయవాదులు, మేధావులు, సామాన్య ప్రజలు ఏకతాటిపైకి వచ్చి పోరాడాలని ఆయన ఆకాంక్షించారు.
సభలో వ్యక్తమైన విశేష స్పందన సమాజంలో రాబోయే గొప్ప మార్పునకు సంకేతమని చెబుతూ తన ప్రసంగాన్ని ముగించారు.
రైతుల కన్నీళ్లపై కార్పొరేట్ వ్యాపారమా?: మాజీ మంత్రి వడ్డే శోభనాద్రీశ్వరరావు ధ్వజం..
సభలో మాజీ మంత్రి, మాజీ ఎంపీ వడ్డే శోభనాద్రీశ్వరరావు మాట్లాడుతూ పాలకుల కార్పొరేట్ అనుకూల వైఖరిపై విరుచుకుపడ్డారు.
చిన్నకారు రైతుల నోళ్లలో మన్నుకొట్టి, సస్యశ్యామలమైన భూములను లాక్కొని కార్గో విమానాశ్రయాలు నిర్మించడంలో ప్రజాస్వామ్యం లేదని, ఉద్ధానం ప్రాంతంలో కిడ్నీ వ్యాధులతో మరణిస్తున్న బాధితులకు మంచి తాగునీరు అందించడంలోనే నిజమైన ప్రజాస్వామ్యం ఉందని ఆయన తన పదునైన హెచ్చరికతో స్పష్టం చేశారు.
బిలియనీర్ల లాభాల కోసం, కమీషన్ల ప్రాజెక్టుల కోసం కోట్లాది ప్రజాధనాన్ని తగలేస్తున్న ప్రభుత్వాలు, అప్పుల ఊబిలో కూరుకుపోయి ప్రాణాలు తీసుకుంటున్న అన్నదాతల ఆక్రందనలను పూర్తిగా విస్మరిస్తున్నాయని ఆయన నిలదీశారు.
ప్రాధాన్యతలు తప్పిన విధానాలపై మండిపాటు..
ప్రాధాన్యతలు తప్పిన పాలకుల విధానాలను ఎండగడుతూ శ్రీకాకుళం జిల్లా మందస ప్రాంత ఉదాహరణను వడ్డే శోభనాద్రీశ్వరరావు సభ ముందుంచారు.
తాటి చెట్లతో, పచ్చని పంటలతో కళకళలాడే ప్రాంతంలో రెండుమూడు ఎకరాల్లో కష్టపడి సాగు చేసుకునే చిన్నకారు రైతుల భూములను లాక్కొని వేల ఎకరాల్లో కార్గో విమానాశ్రయం నిర్మించాల్సిన అవసరం ఏముందని ఆయన ప్రశ్నించారు.
ఒకవైపు ఉద్ధానంలో స్వచ్ఛమైన నీరు లేక ప్రజలు కిడ్నీ వ్యాధులతో చనిపోతుంటే, మరోవైపు రాయలసీమలో తాగునీటి కోసం వేల అడుగుల లోతుకు బావులు తవ్వుతుంటే- ప్రజల కనీస అవసరాలను పక్కనబెట్టి చంద్రబాబు నాయుడు, కేంద్ర ప్రభుత్వాలు బడా వ్యాపారవేత్తల స్వప్రయోజనాల కోసం, కమీషన్ల కోసం భారీ ప్రాజెక్టులను నెత్తిన రుద్దుతున్నాయని ఆయన ఆవేదన వ్యక్తం చేశారు.
వ్యవసాయ రంగంలో పేరుకుపోతున్న తీవ్ర సంక్షోభాన్ని, రైతాంగ ఆత్మహత్యలను ఆయన గణాంకాలతో సహా వివరించిన తీరు ప్రతి ఒక్కరి గుండెను పిండివేసింది.
మోదీ పాలనలో దేశవ్యాప్తంగా 63,000 మంది రైతులు, మరో 58,800 మంది వ్యవసాయ కూలీలు అప్పుల భారం తాళలేక ఆత్మహత్యలకు పాల్పడ్డారని ఆయన కంటతడి పెట్టేలా పేర్కొన్నారు.
లక్షలాది రూపాయలు పెట్టుబడి పెట్టి సాగు చేసిన పంటలు ఎండిపోయి, పెట్టిన అప్పులు తీరక రైతులు కన్నీరుమున్నీరవుతున్నారని వాపోయారు.
సరిహద్దుల పేరుతో 100 కిలోమీటర్ల పరిధిలోని భూములపై అధికారాలు లాక్కోవడం, అనుమతుల విషయంలో గ్రామసభల నిర్ణయాధికారాన్ని రద్దు చేయడం ద్వారా పాలకులే రాజ్యాంగబద్ధమైన ప్రజల హక్కులను ఒక్కొక్కటిగా హరిస్తున్నారని మండిపడ్డారు.
విజయవాడ వేదికగా జరుగుతున్న ఈ ఐక్య పోరాటం కేవలం రాజకీయ ఖైదీల విడుదలకే పరిమితం కాకుండా, రైతులు, కార్మికులు, అణగారిన వర్గాల హక్కుల పరిరక్షణ ఉద్యమంగా మారాలని ఆయన పిలుపునిచ్చారు.
ప్రజా వ్యతిరేక, కార్పొరేట్ అనుకూల విధానాలను నిలదీయడానికి పౌర సమాజం ఏకతాటిపైకి రావాల్సిన సమయం ఆసన్నమైందన్నారు. నాయకులను ప్రజా పక్షాన నిలబడేలా ఒత్తిడి తెచ్చి, బాధ్యతారాహిత్యంగా ప్రవర్తించే ప్రభుత్వాలను ప్రజాగ్రహంతో ప్రశ్నించినప్పుడే నిజమైన మార్పు సాధ్యమవుతుందని ఉద్ఘాటించారు.
మన కోసం, సమాజం కోసం పోరాడే వారిని జైళ్లలో మగ్గనీయకుండా బయటకు తీసుకురావడంతో పాటు, పౌర హక్కుల పరిరక్షణ కోసం క్షేత్రస్థాయి నుంచి ఐక్యపోరాటాలను తీవ్రతరం చేయాలని ఆయన ఆకాంక్షించారు.
విజయవాడ వేదికగా జరిగిన సభలో మాజీ మంత్రి వడ్డే శోభనాద్రీశ్వరరావు కన్వీనర్గా వ్యవహరించగా, సీపీఐ, సీపీఐ(ఎం), కాంగ్రెస్, విరసం, పౌరహక్కుల సంఘం, విభిన్న ప్రజా, కార్మిక, మహిళా, న్యాయవాద సంఘాల నాయకులు పెద్ద సంఖ్యలో పాల్గొన్నారు.
జైళ్లలో ఉన్న రాజకీయ ఖైదీలను, ముఖ్యంగా ఆదివాసీలను విడుదల చేయాలని, అక్రమ కేసులను సమీక్షించాలని విజయవాడ సభ ఏకగ్రీవంగా డిమాండ్ చేసింది.
About the Author
Discover more from The Wire Telugu
Subscribe to get the latest posts sent to your email.
