స్వాతంత్ర్య సమరయోధుడు, రాజ్యాంగ నిర్మాత-ఓ.వి. అలగేశన్

అలగేశన్ జయంతి సెప్టెంబర్ 6. భారత స్వాతంత్ర్యోద్యమ చరిత్రలో మహాత్మా గాంధీ పిలుపుతో విద్యను, వ్యక్తిగత భవిష్యత్తును పక్కనపెట్టి జాతీయోద్యమంలోకి అడుగుపెట్టిన అనేకమంది యువకులు ఉన్నారు. అలాంటి దేశభక్తుల్లో తమిళనాడుకు చెందిన ఓ.వి. అలగేశన్ ఒకరు.

ఆయన కేవలం స్వాతంత్ర్య సమరయోధుడు మాత్రమే కాదు. స్వాతంత్ర్యం అనంతరం భారత రాజ్యాంగ నిర్మాణంలో పాల్గొన్న రాజ్యాంగ సభ సభ్యుడు, పార్లమెంటేరియన్, కేంద్ర మంత్రి, సామాజిక సంస్కర్త, విద్యాభివృద్ధి కి కృషి చేసిన ప్రజాసేవకుడు, ఇథియోపియాలో భారత రాయబారిగా పనిచేసిన దౌత్యవేత్త కూడా. భారత పార్లమెంట్ రికార్డులు ఆయనను స్వాతంత్ర్య సమరయోధుడిగా, రాజ్యాంగ సభ మరియు తాత్కాలిక పార్లమెంట్ సభ్యుడిగా, కేంద్ర మంత్రిగా, సామాజిక సంస్కర్తగా గుర్తించాయి.

బాల్యం—దేశభక్తి వైపు అడుగులు:

ఓ.వి. అలగేశన్ పూర్తి పేరు ఒఝలూర్ విశ్వనాథ ముదలియార్ అలగేశన్. 1911 సెప్టెంబర్ 6న అప్పటి మద్రాస్ ప్రెసిడెన్సీలోని చెంగల్పట్టు ప్రాంతంలోని ఒఝలూర్ గ్రామంలో జన్మించారు. చెన్నైలోని ప్రసిద్ధ ప్రెసిడెన్సీ కాలేజీలో విద్యాభ్యాసం చేశారు. అయితే దేశంలో స్వాతంత్ర్యోద్యమం ఉధృత మవుతున్న సమయంలో, చదువును కొనసాగిస్తూ వ్యక్తిగత భవిష్యత్తును నిర్మించుకోవడం కన్నా దేశ స్వాతంత్ర్య పోరాటంలో పాల్గొనడమే ముఖ్యమని భావించారు. 1930లో తన కళాశాల విద్యను మధ్యలోనే మానేసి జాతీయోద్యమంలో చేరడం ఆయన జీవితంలో కీలక మలుపు.

స్వాతంత్య్రోద్యమం లో పాత్ర:

1930లో మహాత్మా గాంధీ నాయకత్వంలో జరిగిన ఉప్పు సత్యాగ్రహం దేశవ్యాప్తంగా బ్రిటిష్ పాలనకు వ్యతిరేకంగా ప్రజలను సమీకరించింది. యువకుడైన అలగేశన్ కూడా ఈ ఉద్యమంలో పాల్గొన్నారు. ఆయనకు స్వాతంత్ర్యం అనేది కేవలం రాజకీయ నినాదం కాదు. బ్రిటిష్ వలస పాలన నుంచి భారతదేశానికి సంపూర్ణ విముక్తి రావాలని ఆయన ఆకాంక్షించారు. ఉప్పు సత్యాగ్రహంలో పాల్గొన్నందుకు ఆయన జైలు శిక్ష అనుభవించారు. ఉప్పు సత్యాగ్రహం తరువాత కూడా అలగేశన్ ఉద్యమాన్ని కొనసాగించారు.

ఆయన సివిల్ డిస్ ఓబీడియన్స్ ఉద్యమం, క్విట్ ఇండియా ఉద్యమం వంటి వివిధ దశల్లో పాల్గొన్నారు. ఈ ఉద్యమాల్లో పాల్గొన్నందుకు ఆయన మూడు సంవత్సరాలకు పైగా జైలు జీవితం గడిపారు. స్వాతంత్ర్య సమరయోధుల త్యాగాన్ని అర్థం చేసుకోవాలంటే అలగేశన్ వంటి నాయకుల జీవితాన్ని గుర్తు చేసుకోవాలి. ఆ రోజుల్లో జైలుకు వెళ్లడం రాజకీయ పదవి పొందడానికి మార్గం కాదు. అది కుటుంబానికి, వ్యక్తిగత జీవితానికి, ఆర్థిక భద్రతకు పెద్ద త్యాగం. స్వాతంత్ర్యోద్యమంలో చురుకుగా పాల్గొంటూనే ఆయన కాంగ్రెస్ సంస్థాగత కార్యకలాపాల్లో కూడా పనిచేశారు. ఆయన చెంగల్పట్టు జిల్లా కాంగ్రెస్ కమిటీలో, తమిళనాడు కాంగ్రెస్ కమిటీలో, AICC సభ్యునిగా బాధ్యతల నిర్వహించారు.

రాజ్యాంగ సభలో ఓ.వి. అలగేశన్:

భారతదేశానికి స్వాతంత్ర్యం సమీపిస్తున్న సమయంలో దేశ భవిష్యత్ రాజకీయ వ్యవస్థను రూపొందించడానికి రాజ్యాంగ సభ (Constituent Assembly) ఏర్పడింది. అలగేశన్ ఆ రాజ్యాంగ సభకు సభ్యుడిగా ఎన్నికయ్యారు. 1946 నుంచి 1950 వరకు ఆయన రాజ్యాంగ నిర్మాణ ప్రక్రియలో భాగస్వామి అయ్యారు. అనంతరం తాత్కాలిక పార్లమెంట్‌లో కూడా పనిచేశారు.

రాజ్యాంగ సభలో ఆయన ద్వి సభా శాసన వ్యవస్థ, నిర్బంధ నిర్బంధం, రాష్ట్రాల అధికారాలు, కేంద్ర-రాష్ట్ర సంబంధాలు వంటి అంశాలపై తన అభిప్రాయాలను వ్యక్తం చేశారు. ప్రత్యేకంగా రాష్ట్రాల స్వయంప్రతిపత్తి, కేంద్ర అధికారాల పరిమితి వంటి అంశాలపై ఆయన ఆందోళన వ్యక్తం చేసినట్లు రాజ్యాంగ చరిత్రకు సంబంధించిన ఆధారాలు పేర్కొంటున్నాయి.

స్వాతంత్ర్యం తరువాత పార్లమెంటరీ జీవితం:

స్వాతంత్ర్యం వచ్చిన తరువాత కూడా అలగేశన్ ప్రజా జీవితాన్ని విడిచిపెట్టలేదు. 1952లో జరిగిన తొలి సాధారణ ఎన్నికల్లో ఆయన చెంగల్పట్టు నియోజకవర్గం నుంచి లోక్‌సభకు ఎన్నికయ్యారు. తరువాత 1962లో, 1971లో కూడా లోక్‌సభకు ఎన్నికయ్యారు. అంటే స్వాతంత్ర్య సమరయోధుడిగా ప్రారంభమైన ఆయన ప్రయాణం ప్రజాస్వామ్య భారతదేశ పార్లమెంటరీ వ్యవస్థలో కూడా కొనసాగింది. జవహర్‌లాల్ నెహ్రూ మంత్రివర్గంలో అలగేశన్ కీలక బాధ్యతలు నిర్వహించారు. 1952–57 మధ్య కాలంలో ఆయన రవాణా మరియు రైల్వేల శాఖలో డిప్యూటీ మంత్రిగా పనిచేశారు.1962 తరువాత నీటిపారుదల, విద్యుత్, గనులు, ఇంధనం, పెట్రోలియం, రసాయనాలు శాఖల్లో కేంద్ర సహాయ మంత్రిగా బాధ్యతలు నిర్వర్తించారు.1964–66 కాలంలో లాల్ బహదూర్ శాస్త్రి ప్రధానమంత్రిగా ఉన్న సమయంలో కూడా ఆయన కేంద్ర మంత్రిగా కొనసాగారు.

తమిళనాడు పారిశ్రామిక అభివృద్ధికి కృషి:

అలగేశన్ సేవలు కేవలం పార్లమెంటరీ ప్రసంగాలకు పరిమితం కాలేదు. తమిళనాడు పారిశ్రామిక, శాస్త్రీయ అభివృద్ధికి సంబంధించిన అనేక ప్రాజెక్టులకు కేంద్ర స్థాయిలో ఆయన సహకరించారు. భారత రైల్వేలకు అత్యంత ముఖ్యమైన రైలు కోచ్ తయారీ కేంద్రాలలో ఒకటైన (ICF) ఏర్పడటానికి, మద్రాస్ రిఫైనరీస్, చమురు శుద్ధి పరిశ్రమ అభివృద్ధికి కల్పక్కం అణు పరిశోధన/విద్యుత్ కేంద్రం ఏర్పాటుకు కూడా ఆయన కృషి చేశారు. 2011లో ఆయన శతజయంతి సందర్భంగా జరిగిన కార్యక్రమాల్లో ఈ అభివృద్ధి కార్యక్రమాలకు ఆయన చేసిన సేవలను ప్రత్యేకంగా ప్రస్తావించారు.

హిందీ వ్యతిరేక ఉద్యమం — మంత్రి పదవికి రాజీనామా:

అలగేశన్ జీవితంలో మరో ముఖ్యమైన రాజకీయ ఘట్టం భాషా విధానం. 1965లో హిందీని కేంద్ర ప్రభుత్వ అధికార భాషగా అమలు చేసే విధానంపై తమిళనాడులో తీవ్ర ఆందోళనలు జరిగాయి. తమిళ ప్రజల భాషా హక్కుల విషయంలో అలగేశన్ తన అభిప్రాయాన్ని స్పష్టంగా వ్యక్తం చేశారు.1965 ఫిబ్రవరిలో ఆయన, తమిళనాడుకు చెందిన మరో కేంద్ర మంత్రి సి. సుబ్రమణ్యం కేంద్ర ప్రభుత్వ భాషా విధానానికి నిరసనగా తమ మంత్రి పదవులకు రాజీనామా చేశారు. తరువాత ప్రధాని లాల్ బహదూర్ శాస్త్రి ఇచ్చిన హామీల నేపథ్యంలో వారి రాజీనామాలు ఉపసంహరించుకున్నారు. ఇది ఆయనకు పదవికన్నా విధానం, ప్రజల భావోద్వేగాలు ముఖ్యమని చూపించే సంఘటన.

సామాజిక సంస్కర్తగా అలగేశన్:

అలగేశన్ రాజకీయ నాయకుడిగా మాత్రమే కాకుండా సామాజిక సంస్కర్తగా కూడా గుర్తింపు పొందారు.
ఆయన అంటరానితనం నిర్మూలన, సామాజిక సమానత్వం, మద్యపాన నిషేధం వంటి సామాజిక సమస్యలపై పనిచేశారు. 1992లో ఆయన మరణించిన సందర్భంగా లోక్‌సభలో చేసిన సంతాప ప్రసంగంలో కూడా ఆయనను సామాజిక సంస్కర్తగా, విశిష్ట పరిపాలకుడిగా, అంటరానితనం, మద్యపానం వంటి సామాజిక దుష్ప్రవర్తనల నిర్మూలనకు కృషి చేసిన వ్యక్తిగా పార్లమెంట్ గుర్తించింది.

1958లో ఆయన భక్తవత్సలం ఎడ్యుకేషనల్ ట్రస్ట్ను స్థాపించారు. విద్యను సామాజిక అభివృద్ధికి ప్రధాన సాధనంగా భావించిన ఆయన విద్యాసంస్థల అభివృద్ధికి కృషి చేశారు. తరువాత ఈ ట్రస్ట్ ఆధ్వర్యంలో పాఠశాలలు, పాలిటెక్నిక్, ఇతర విద్యాసంస్థలు ఏర్పడ్డాయి. ఇది ఆయన ఆలోచనల్లో ఒక ముఖ్యమైన అంశాన్ని తెలియజేస్తుంది. స్వాతంత్ర్యం రాజకీయ స్వేచ్ఛతో మాత్రమే పూర్తి కాదు. విద్య, సామాజిక సమానత్వం, ఆర్థిక అభివృద్ధి కూడా అవసరం.

అలగేశన్‌కు సాహిత్యాభిమాని. చరిత్ర, ప్రపంచ రాజకీయాలు, సాహిత్యంపై కూడా ఆసక్తి ఉండేది. జవహర్‌లాల్ నెహ్రూ రచించిన“Glimpses of World History”ను తమిళంలోకి అనువదించారు. ఆయన అనువాదం ద్వారా ప్రపంచ చరిత్రను తమిళ పాఠకులకు మరింత సులభంగా అందించడానికి ప్రయత్నించారు. పార్లమెంట్ రికార్డులు కూడా ఈ రచనను ఆయన ప్రచురణలలో ఒకటిగా పేర్కొన్నాయి.

1968 నుంచి 1971 వరకు అలగేశన్ ఇథియోపియాలో భారత రాయబారిగా పనిచేశారు. ఇది ఆయన రాజకీయ నాయకుడిగా మాత్రమే కాకుండా దౌత్యవేత్తగా కూడా దేశానికి సేవ చేసినట్లు చూపిస్తుంది. అలగేశన్ జీవితంలోని ముఖ్యమైన లక్షణం ఏమిటంటే ఆయన రాజకీయ పదవులను తన వ్యక్తిగత ప్రయోజనాల కోసం ఉపయోగించుకున్న నాయకుడిగా కాకుండా స్వాతంత్ర్యోద్యమంలో త్యాగం చేసి, స్వాతంత్ర్యం తరువాత దేశ నిర్మాణానికి పనిచేసిన నాయకుడిగా గుర్తింపు పొందారు. 2011లో ఆయన శతజయంతి సందర్భంగా తమిళనాడు నాటి గవర్నర్ కె. రోశయ్య మాట్లాడుతూ, అలగేశన్ వంటి స్వాతంత్ర్య సమరయోధులు దేశం కోసం త్యాగం చేయడాన్ని గర్వంగా భావించారని, ఆయన ఆదర్శాలను అనుసరించాలని పిలుపునిచ్చారు.

ఓ.వి. అలగేశన్ 1992 జనవరి 3న మరణించారు. ఆయన మరణానంతరం లోక్‌సభలో జరిగిన సంతాప కార్యక్రమంలో ఆయన స్వాతంత్ర్య సమరయోధుడిగా, రాజ్యాంగ సభ సభ్యుడిగా, కేంద్ర మంత్రిగా, పార్లమెంటేరియన్‌గా, సామాజిక సంస్కర్తగా చేసిన సేవలను సభ అధికారికంగా స్మరించింది.

ముగింపు:

ఓ.వి. అలగేశన్ జీవితాన్ని మూడు దశలుగా చూడవచ్చు. మొదటి దశ స్వాతంత్ర్య సమరం. విద్యను వదిలి ఉప్పు సత్యాగ్రహంలో పాల్గొనడం, సివిల్ డిస్ఓబీడియన్స్, వ్యక్తిగత సత్యాగ్రహం, క్విట్ ఇండియా ఉద్యమాల్లో పాల్గొనడం, మూడు సంవత్సరాలకు పైగా జైలు జీవితం. రెండో దశ రాజ్యాంగం, ప్రజాస్వామ్యం రాజ్యాంగ సభ సభ్యుడిగా భారతదేశ భవిష్యత్ రాజకీయ వ్యవస్థ రూపకల్పనలో భాగస్వామ్యం, అనంతరం పార్లమెంటరీ ప్రజాస్వామ్యంలో ప్రజాప్రతినిధిగా సేవ. మూడో దశ దేశ నిర్మాణం. కేంద్ర మంత్రిగా పరిశ్రమలు, రైల్వేలు, విద్యుత్, నీటిపారుదల, పెట్రోలియం వంటి రంగాల్లో పనిచేయడం. తమిళనాడు పారిశ్రామిక అభివృద్ధికి తోడ్పడడం. సామాజిక సంస్కరణలకు, విద్యాభి వృద్ధికి కృషి చేయడం, ఇథియోపియాలో భారత రాయబారిగా దేశానికి ప్రాతినిధ్యం వహించడం. అందువల్ల సెప్టెంబర్ 6న ఓ.వి. అలగేశన్ జయంతిని స్మరించుకోవడం అంటే ఒక వ్యక్తిని మాత్రమే గుర్తుచేసుకోవడం కాదు. స్వాతంత్ర్యం కోసం త్యాగం చేసిన తరం, రాజ్యాంగ ప్రజాస్వామ్యాన్ని నిర్మించిన తరం, స్వతంత్ర భారతదేశాన్ని నిర్మించడానికి కృషి చేసిన తరం యొక్క సేవలను గుర్తుచేసుకోవడం.

ప్రజల ఓట్లతో గెలిచి రాష్ట్ర అభివృధ్ధి, ప్రజల మనోభావాలను త్రోసిపుచ్చి పదవి పట్టకుని వేలాడే నేతలను చూస్తున్న నేడు, మంత్రి పదవిని వదులుకొని ప్రజల మనోభావాలను గౌరవించిన అలగేశన్ ను రాజకీయాలకు అతీతంగా ఆదర్శంగా తీసుకునే నేతలను ప్రోత్సహించడమే అలాగేసన్ నిజమైన నివాళి.

About the Author

The Wire Editorial Team

Administrator

View All Posts