విద్యావ్యవస్థను ప్రైవేటీకరిస్తూ, ప్రశ్నించే విద్యార్థుల భవిష్యత్తును వ్యాపార సరుకుగా మారుస్తున్న పాలకుల నిరంకుశ విధానాలపై ఎస్ఎఫ్ఐ అఖిల భారత జాయింట్ సెక్రటరీ, జేఎన్యూ విద్యార్థి యూనియన్ మాజీ అధ్యక్షురాలు ఐషీ ఘోష్ నిప్పులు చెరిగారు.
విజయవాడలోని కామ్రేడ్ బసవపున్నయ్య విజ్ఞాన కేంద్రం(సమావేశ మందిరం)లో 27న జరిగిన ‘జన్-జెడ్’ భారీ బహిరంగ సభలో ఆమె ముఖ్య వక్తగా ప్రసంగించారు.
హాలు కిటకిటలాడేలా తరలివచ్చిన విద్యార్థి, యువజన లోకంతో సభ మార్మోగగా- ఆద్యంతం అలవోకగా, స్ఫూర్తిదాయకంగా సాగిన ఐషీ ఘోష్ సమగ్ర ప్రసంగ పాఠం ఇది..
పాలకుల పీఠాల కంటే ప్రజల ఐక్య శక్తే మిన్న..
విజయవాడ బసవపున్నయ్య మందిరంలో భారీగా తరలివచ్చిన యువతను ఉద్దేశించి ప్రసంగిస్తూ— జంతర్ మంతర్ వేదికగా సాగిన చారిత్రాత్మక విద్యార్థి ఉద్యమ విజయం కేవలం కొద్దిమందిది కాదని, స్వాతంత్ర్య సమరయోధుల వారసత్వాన్ని పుణికిపుచ్చుకుని రోడ్లపైకి వచ్చిన ఈ తరం మొత్తానిదని ఐషీ ఘోష్ స్పష్టం చేశారు.
‘అధికార పీఠాల్లో కూర్చున్న నిరంకుశ పాలకుల బలం కంటే- వీధుల్లో నిలబడిన ప్రజల ఐక్య శక్తే ఎల్లప్పుడూ మహత్తరమైనదని చరిత్ర నిరూపించింది’ అని ఆమె ఉద్ఘాటించారు.
12 ఏళ్ల కడుపుకోత… విద్యార్థులను పరాన్నజీవులుగా మార్చిన వ్యవస్థ..
ఢిల్లీ జంతర్ మంతర్ ఉద్యమం ఆకస్మికంగా ఊడిపడలేదని, గత 12 ఏళ్లుగా ఈ దేశంలో పాలకుల వినాశకర విధానాల వల్ల కుమిలిపోతున్న యువత ఆక్రోశానికి అది ప్రతిరూపమని ఆమె పేర్కొన్నారు.
మే 15న సుప్రీంకోర్టు విచారణలో రాజ్యాంగబద్ధ పదవుల్లో ఉన్నవారు విద్యార్థులను ‘రక్తపింజరులు’, ‘పరాన్నజీవులు’ అని సంబోధించడాన్ని ఆమె తీవ్రంగా నిరసించారు.
శ్రమజీవుల పిల్లలెవరూ పరాన్నజీవులుగా మారాలని కోరుకోలేదని, ఈ దళారీ వ్యవస్థే వారిని వీధుల్లోకి నెట్టిందని ఐషీ ఘోష్ దుయ్యబట్టారు.
‘నీట్’ పేపర్ లీకేజీలు… కన్నీళ్ల వ్యాపారం..
2026లో ఇప్పుడు జరుగుతున్న ‘నీట్’ ప్రశ్నాపత్రాల లీకేజీలు కొత్తవేమీ కావని, 2024లోనూ ఇదే జాతీయ పరీక్షల సంస్థ(ఎన్టీఏ) హయాంలో పేపర్లు లీకయ్యాయని ఆమె ధ్వజమెత్తారు.
రోజుకు 10-12 గంటలు కష్టపడి, ఆటపాటలను త్యాగం చేసి చదువుకుంటున్న విద్యార్థుల జీవితాలతో ఎన్టీఏ ఆడుకుంటోందని, ప్రభుత్వం విద్యార్థుల భవిష్యత్తును కార్పొరేట్ వ్యాపారులకు తాకట్టు పెడుతోందని ఆరోపించారు.
22 మంది విద్యార్థుల బలవన్మరణాలు ‘ఇన్స్టిట్యూషనల్ మర్డర్స్’..
పోటీ పరీక్షల కుంభకోణాలు, పేపర్ లీకేజీల వల్ల మనోవేదనకు గురై ఆత్మహత్యలు చేసుకున్న ఆ 22 మంది విద్యార్థుల మరణాలకు ప్రభుత్వమే బాధ్యత వహించాలని ఐషీ ఘోష్ నిలదీశారు. అవి ఆత్మహత్యలు కావు, పాలకుల అసంబద్ధ విధానాలు చేసిన దారుణమైన ‘ఇన్స్టిట్యూషనల్ మర్డర్స్’(సంస్థాగత హత్యలు) అని ఆమె మండిపడ్డారు.
ఏడేళ్లలో లక్ష బడుల మూసివేత… విగ్రహాలకు కోట్లు – విద్యకు సున్నా..
గత 7 ఏళ్లలో దేశవ్యాప్తంగా లక్షకు పైగా ప్రభుత్వ పాఠశాలలను మూసివేశారని ఆమె ఆందోళన వ్యక్తం చేశారు. ఉత్తరప్రదేశ్, రాజస్థాన్లలో ఆవుల కొట్టాల్లో, గేదెల పాకల్లో ప్రభుత్వ బడులు నడుస్తున్నాయని పేర్కొన్నారు.
ఫ్లెక్సీలకు, విగ్రహాలకు, డీజే పార్టీలకు వందల కోట్లు తగలేసే పాలకులకు- దేశానికి వెన్నుముక లాంటి విద్యావ్యవస్థకు పైసా కేటాయించడానికి మనసు రావడం లేదని విమర్శించారు.
డిగ్రీలు ఉన్నా డెలివరీ బాయ్స్ గానే..
జంతర్ మంతర్లో తనకు ఎదురైన ఒక యూపీ యువకుడి కథను ఐషీ ఘోష్ గుర్తు చేసుకున్నారు. డిగ్రీ పూర్తి చేసి, నాలుగేళ్లు పోటీ పరీక్షలు రాసినా ప్రశ్నాపత్రాల లీకేజీలతో ఏళ్లు గడిచిపోయాయని- 30 ఏళ్ల వయసొచ్చినా ఉద్యోగం రాక, కుటుంబ పోషణ కోసం ఢిల్లీ వచ్చి జొమాటో, స్విగ్గీల్లో డెలివరీ బాయ్గా పనిచేస్తున్నాడని వివరించారు.
దేశ యువశక్తిని ఇలా వీధుల్లో దిక్కులేని వారిగా మార్చడమేనా పాలకుల నవభారత వికాసం? అని ప్రశ్నించారు.
ఐఐటీ ఢిల్లీ విషాదం – వ్యవస్థ విఫలమైంది..
ఇటీవల ఢిల్లీ ఐఐటీలో ఎంఎస్సీ విద్యార్థి ఆత్మహత్య చేసుకున్న ఘటనపై స్పందిస్తూ- తండ్రిని కోల్పోయి తీవ్ర ఆర్థిక ఇబ్బందుల్లో ఉన్నానని, హాస్టల్ వసతి ఇవ్వాలని కోరినా యాజమాన్యం పట్టించుకోలేదని తెలిపారు.
స్వాతంత్ర్యం వచ్చి దాదాపు 80 ఏళ్లవుతున్నా- ఈ దేశంలో విద్యార్థికి బ్రతకడం కంటే చావడం సులభంగా మారడం మన సామాజిక విఫలత్వానికి నిదర్శనమని ఆవేదన వ్యక్తం చేశారు.
ఆంక్షల జామర్లు పెట్టినా ఆగని విద్యార్థి ఉద్యమం..
జంతర్ మంతర్ ఉద్యమాన్ని అణచివేసేందుకు కేంద్ర ప్రభుత్వం సెంట్రల్ ఢిల్లీలో 4 కిలోమీటర్ల మేర ఇంటర్నెట్ జామర్లు పెట్టిందని ఐషీ ఘోష్ వెల్లడించారు.
అయినా విద్యార్థులు భయపడక, 5 కిలోమీటర్లు నడిచివెళ్లి వైఫై ఉన్న చోట నిరసన వీడియోలను సోషల్ మీడియాలో అప్లోడ్ చేసి వచ్చి మరీ పోరాడారని- పాలకుల ఆంక్షలు ఈ తరం ఆక్రోశాన్ని ఆపలేవని రుజువు చేశారని అన్నారు.
సోనమ్ వాంగ్చుక్ అరెస్ట్ – వేలాది జంతర్ మంతర్ల పుట్టుక..
21 రోజులుగా నిరాహార దీక్ష చేస్తున్న పర్యావరణవేత్త సోనమ్ వాంగ్చుక్ను ఢిల్లీ పోలీసులు తెల్లకాగితం మడతబెట్టినట్లు సివిల్ దుస్తుల్లో వచ్చి బలవంతంగా ఈడ్చుకెళ్లారని ఆమె నిరసించారు.
ఒక్క సోనమ్ వాంగ్చుక్ను అరెస్టు చేయగలిగినా, ఆయన విప్లవాత్మక ఆలోచనలను ప్రభుత్వం ఆపలేకపోయిందని- ఆ ఒక్క ఘటన దేశవ్యాప్తంగా వేలాది జంతర్ మంతర్ ఉద్యమాలకు జన్మనిచ్చిందని పేర్కొన్నారు.
ప్లాస్టిక్ దేశభక్తి వర్సెస్ నిజమైన దేశభక్తి..
పోలీసులు లాఠీ ఛార్జీలు చేస్తూ, బాష్పవాయు గోళాలు ప్రయోగిస్తున్న వేళ జంతర్ మంతర్లో విద్యార్థులు జాతీయ గీతాన్ని ఆలాపిస్తూ ఎదురొడ్డి నిలిచారని ఐషీ ఘోష్ గుర్తుచేశారు.
పాలకులది ప్లాస్టిక్ ముసుగు దేశభక్తి అయితే- విద్యావ్యవస్థను, దేశ రాజ్యాంగాన్ని కాపాడుకోవడానికి దెబ్బలు తింటున్న విద్యార్థులదే అసలైన దేశభక్తి అని స్పష్టం చేశారు.
కేంద్ర విద్యాశాఖ మంత్రి రాజీనామా – ప్రజాశక్తి విజయం..
విద్యార్థులు జరిపిన 37 రోజుల సుదీర్ఘ పోరాట ధాటికి తలొగ్గి నాటి కేంద్ర విద్యాశాఖ మంత్రి ధర్మేంద్ర ప్రధాన్ రాజీనామా చేయాల్సి వచ్చిందని ఆమె తెలిపారు.
ఐక్యంగా పోరాడితే నిరంకుశ పాలకులు ఎంతటివారైనా దిగిరాక తప్పదని ఈ పోరాటం నిరూపించిందని ఉద్ఘాటించారు.
“మా బుర్రలే మా ఆయుధాలు..”
2016లో హైదరాబాద్ సెంట్రల్ యూనివర్సిటీలో(హెచ్సీయూ) స్కాలర్షిప్ నిలిపివేసి రోహిత్ వేములను బలితీసుకున్న నాటి నుంచి, జేఎన్యూ వరకు ప్రశ్నించే వర్సిటీలపై ‘దేశద్రోహం’ ముద్రలు వేస్తున్నారని ఆమె మండిపడ్డారు.
‘పాలకులారా వినండి… మా ఆలోచనలే, మా బుర్రలే మా ఆయుధాలు. మీ వాట్సాప్ యూనివర్సిటీల అబద్ధపు ప్రచారాన్ని తిప్పికొట్టడానికి ఈ పెన్నులను, ఆలోచనలను ఆయుధాలుగా వాడుతూనే ఉంటాం’ అని ఐషీ ఘోష్ హెచ్చరించారు.
అంబేడ్కర్, సావిత్రిబాయి ఫూలేల విప్లవ వారసత్వం..
పిల్లల చేతులకు మతం, కులం పేరుతో ఆయుధాలు ఇచ్చే సంస్కృతి పాలకులదైతే- బాబాసాహెబ్ అంబేడ్కర్, సావిత్రిబాయి ఫూలే, ఫాతిమా షేక్ మన చేతులకు పుస్తకాలు, పెన్నులు ఇచ్చారని ఆమె అన్నారు.
కత్తి కంటే పెన్ను పదునైనదని, దానితోనే ఈ సమాజంలో విప్లవాత్మక మార్పు సాధ్యమని విశ్వసిస్తున్నామని చెప్పారు.
చీకటిని తరిమే కొవ్వొత్తులుగా మారండి..
చీకటి నిండిన గదిలో ఒక్క కొవ్వొత్తి వెలిగితే మొత్తం చీకటి పటాపంచలవుతుందని, నేటి యువత సమాజంలో ఆ కొవ్వొత్తులుగా మారాలని ఐషీ ఘోష్ పిలుపునిచ్చారు.
భయం సమాజాన్ని కాపాడలేదని, మనం ధైర్యంగా ప్రశ్నించడం మొదలుపెడితే అది పక్కన ఉన్న వంద మందికి ఉద్యమ ఊపిరినిస్తుందని పేర్కొన్నారు.
కంటెంట్ క్రియేటర్లపై పోలీసు వేధింపులు..
జంతర్ మంతర్ ఉద్యమానికి మద్దతు తెలిపిన యూట్యూబర్లు, సోషల్ మీడియా ఇన్ఫ్లుయెన్సర్లపై ప్రభుత్వాలు ఎఫ్ఐఆర్లు నమోదు చేసి వేధిస్తున్నాయని ఆమె దుయ్యబట్టారు.
ప్రశ్నించే ప్రతీ డిజిటల్ గొంతుకను భయపెట్టాలని చూస్తున్న పాలకుల కుట్రలను విద్యార్థి లోకం భగ్నం చేస్తుందని అన్నారు.
ఆంధ్రప్రదేశ్లోనూ ఊపందుకుంటున్న ఉద్యమాలు..
ఢిల్లీ ఉద్యమంతో పాటు ఆంధ్రప్రదేశ్ రాష్ట్రంలోనూ ఎస్ఎఫ్ఐ నాయకత్వంలో విద్యార్థులు రోడ్లపైకి వచ్చి నినదించారని ఐషీ ఘోష్ కొనియాడారు.
ఇక్కడి పాలకులు కూడా ఢిల్లీ పెద్దలకు భజన చేస్తూ, నిధుల కోతలు విధిస్తూ పాఠశాలలను మూసివేస్తున్నారని- ఈ వినాశకర విధానాలపై ఏపీ విద్యార్థి లోకం ఐక్యంగా పోరాడాలని పిలుపునిచ్చారు.
పిడికిలిగా బిగుద్దాం… భయరహిత భారతాన్ని నిర్మిద్దాం..
చేతి వేళ్లు విడివిడిగా ఉంటే ఏమీ చేయలేవని, అదే ఐదు వేళ్లు కలిస్తే శక్తివంతమైన పిడికిలి అవుతుందని ఐషీ ఘోష్ ముగించారు.
‘విద్యార్థులారా… చదువుకోండి, ఐక్యమవ్వండి, పోరాడండి.. భగత్ సింగ్, అంబేడ్కర్ కలలు కనిన భయరహిత, లౌకిక, సోషలిస్టు భారతాన్ని నిర్మించే వరకు ఎస్ఎఫ్ఐ పోరాటం ఆగదు’ అని స్పష్టం చేశారు.
సభ ముగింపులో ‘ఇంక్విలాబ్ జిందాబాద్’ నినాదాలతో బసవపున్నయ్య మందిరం మార్మోగింది.
About the Author
Discover more from The Wire Telugu
Subscribe to get the latest posts sent to your email.
