సమగ్ర విశ్లేషణ: సావరిన్ కంప్యూటింగ్ ముసుగులో వనరుల దోపిడీ- 1

ఆంధ్రప్రదేశ్ రాష్ట్ర తీరప్రాంతం ప్రస్తుతం ఒక భయానక పర్యావరణ, వనరుల సంక్షోభం వైపు పరుగెడుతోంది.

అంతర్జాతీయంగా కృత్రిమ మేధస్సుతోపాటు క్లౌడ్ కంప్యూటింగ్ రంగాలు అసాధారణ వేగంతో విస్తరిస్తోంది.

ఈ తరుణంలో, వాటికి అవసరమయ్యే భౌతిక మౌలిక సదుపాయాలైన మెగా డేటా సెంటర్ల నిర్మాణానికి ఆంధ్రప్రదేశ్ వేదికగా మారుతోంది.

ఈ పరిణామాలను పాలకులు, కార్పొరేట్ శక్తులు దేశీయ డిజిటల్ మౌలిక సదుపాయాల స్థాపన లేదా “సార్వభౌమ కంప్యూటింగ్” అనే ఆకర్షణీయమైన జాతీయ నినాదంతో సమర్థిస్తున్నారు.

అయితే, ఈ సార్వభౌమత్వ నినాదం వెనుక అంతర్జాతీయ టెక్ దిగ్గజాల ప్రయోజనాల కోసం స్థానిక సహజ వనరులను నిస్సిగ్గుగా కొల్లగొట్టే ఒక వినాశకరమైన కార్పొరేట్ లూటీ దాగి ఉందనే చేదు నిజాన్ని ఈ పరిశోధనాత్మక నివేదిక బహిర్గతం చేస్తోంది.

గూగుల్, అదానీ, రిలయన్స్ వంటి అలియాన్స్ గ్రూపులు ఆంధ్రప్రదేశ్ తీరప్రాంతాన్ని తమ అంతర్జాతీయ క్లౌడ్ సామ్రాజ్య విస్తరణ కోసం ఒక బలిపీఠంగా మార్చుకుంటున్నాయి.

పాశ్చాత్య దేశాలు తమ విద్యుత్ గ్రిడ్ల భద్రత కోసం, పర్యావరణ పరిరక్షణ కోసం తిరస్కరిస్తున్న ఈ భారీ పారిశ్రామిక ప్రాజెక్టులను, మన పాలకులు ఎటువంటి నియంత్రణలు లేకుండా, చట్టాలను తుంగలో తొక్కి మరీ స్వాగతించడం రాష్ట్ర భవిష్యత్తుకు గొడ్డలిపెట్టుగా మారనుంది.

రాజకీయ పార్టీల డబుల్ గేమ్, మోసపూరిత వైఖరి..

ఆంధ్రప్రదేశ్ రాజకీయ క్షేత్రంలో ప్రస్తుతం అధికారంలో ఉన్న కూటమి ప్రభుత్వం, ప్రతిపక్షంలో ఉన్న వైఎస్సార్సీపీ రెండూ ప్రజల కళ్లల్లో మట్టి కొడుతూ ఒకేరకమైన కార్పొరేట్ అనుకూల విధానాన్ని అనుసరిస్తున్నాయి.

ఈ రెండు ప్రధాన రాజకీయ పక్షాల మధ్య నడుస్తున్న పోరాటం కేవలం ప్రాజెక్టుల క్రెడిట్ కొట్టేయడానికి సాగుతున్న ఒక మోసపూరితమైన “క్రెడిట్ వార్”, “డబుల్ గేమ్” మాత్రమే.

రికార్డులను పరిశీలిస్తే, 2023 మే 3న అప్పటి ముఖ్యమంత్రి వైఎస్ జగన్ విశాఖపట్నం కాపులుప్పాడ వద్ద ₹70,000 కోట్ల పెట్టుబడితో అదానీ డేటా సెంటర్‌కు ఎంతో ఆర్భాటంగా శంకుస్థాపన చేశారు.

ఆ సమయంలో స్థానిక పర్యావరణ సమతుల్యత, భూగర్భ జలాల క్షీణత గురించి స్వతంత్ర పౌర సమాజం గొంతెత్తినా అప్పటి వైఎస్సార్సీపీ ప్రభుత్వం కార్పొరేట్ ప్రయోజనాలకే పెద్దపీట వేసింది.

నేడు అధికారం మారిన తర్వాత, 2026 ఏప్రిల్ 28న ప్రస్తుత ముఖ్యమంత్రి నారా చంద్రబాబు నాయుడు, ఐటీ మంత్రి నారా లోకేష్ తర్లువాడ వద్ద అదే ప్రాజెక్టుకు గూగుల్-అదానీ ఇండియా ఏఐ హబ్ పేరుతో మళ్లీ శంకుస్థాపన చేసి, ఇది తమ పాలనా దక్షత వల్లే సాధ్యపడిందని రంగులు అద్దుకుంటున్నారు.

ప్రతిపక్షంలో ఉన్నప్పుడు అదానీ ప్రాజెక్టును విమర్శించిన కూటమి నేతలు, నేడు అదానీ గ్రూప్‌కు మరిన్ని వనరులను దోచిపెడుతుండగా, అటు వైఎస్సార్సీపీ నేతలు ఇప్పుడు అకస్మాత్తుగా పర్యావరణవేత్తల అవతారం ఎత్తి దళిత భూముల గురించి నిరసనలు తెలపడం వారి ద్వంద్వ నీతికి పరాకాష్ట.

ఈ రెండు పార్టీలూ తెరవెనుక కార్పొరేట్ కంపెనీలైన గూగుల్, అదానీలతో రహస్య ఒప్పందాలు కుదుర్చుకుంటూ, జనాన్ని కేవలం ఓటు బ్యాంకుగా మాత్రమే వాడుకుంటూ తీవ్రమైన రాజద్రోహానికి పాల్పడుతున్నాయి.

ఆంధ్రప్రదేశ్‌లోకి చొరబడుతున్న మెగా డేటా సెంటర్ల నెట్వర్క్..

రాష్ట్రంలో పెట్టుబడుల పేరుతో స్థానిక వనరులను దోపిడీ చేయడానికి ప్రభుత్వాలు అనుమతించిన, ప్రతిపాదించిన ప్రధాన ఏఐ డేటా సెంటర్ల అధికారిక జాబితాను పరిశీలిస్తే, రాష్ట్ర తీరప్రాంతం ఏ స్థాయిలో కార్పొరేట్ గుత్తాధిపత్యంలోకి వెళ్తుందో స్పష్టమవుతుంది.

విశాఖపట్నంలో గూగుల్ తన అనుబంధ సంస్థ అయిన రాడెన్ ఇన్ఫోటెక్, అదానీ కనెక్స్, ఎయిర్టెల్‌కు చెందిన నెక్స్ట్రాలతో భాగస్వామ్యం కుదుర్చుకుని 1-GW(1,000 MW) అపారమైన సామర్థ్యం గల ఏఐ డేటా సెంటర్ క్యాంపస్ నిర్మాణాన్ని ప్రారంభించింది.

ఈ ప్రాజెక్ట్ కోసం జారీ చేసిన జీఓ ఎమ్మెస్ నెం 66(ITE&C Promotions Department, తేదీ: 02.12.2025) ద్వారా విశాఖపట్నం, అనకాపల్లి జిల్లాలలో 480 ఎకరాలు కారుచౌకగా కేటాయించగా, ఆ తదుపరి జారీ చేసిన జీఓ ఎమ్మెస్ నెం. 2(ITE&C Promotions Department, తేదీ: 18.02.2026) ద్వారా ఈ భూముల కేటాయింపును ఏకంగా 601.40 ఎకరాలకు పెంచారు.

దీనికి తోడు, రిలయన్స్ ఇండస్ట్రీస్(RIL), బ్రూక్ ఫీల్డ్ కార్పొరేషన్, అమెరికాకు చెందిన డిజిటల్ రియాల్టీల ఉమ్మడి సంస్థ అయిన డిజిటల్ కనెక్సిన్ కలిసి విజయనగరం జిల్లా భోగాపురం, పోలిపల్లి పరిసర ప్రాంతాలలో జీఓ ఎమ్మెస్ నెం 30(ITE&C Promotions Department, తేదీ: 20 మే 2026) ద్వారా ఏకంగా 854.97 ఎకరాల భూమిని సేకరించి, 1.5 గిగావాట్ల1,500 MW) విద్యుత్ సామర్థ్యంతో పనిచేసే భారీ గిగా-స్కేల్ ఏఐ డేటా సెంటర్ క్లస్టర్ ను ప్రతిపాదించాయి.

ఈ ప్రాజెక్ట్ కోసం ప్రభుత్వం దాదాపు ₹19,100 కోట్ల అపారమైన పన్ను రాయితీలు, విద్యుత్ ఛార్జీల మినహాయింపులను ప్రజాధనం నుంచి ప్రకటించడం గమనార్హం.

మరోవైపు, అదానీ ConneX విడిగా విశాఖపట్నం కాపులుప్పాడ, మధురవాడ వద్ద 300 MW ఇంటిగ్రేటెడ్ డేటా సెంటర్ పార్కును కూడా నిర్మిస్తోంది.

ఈ సంస్థ ఎన్విడియాకు చెందిన అత్యంత అధునాతన B200, B300 GPUలను యాక్సెస్ చేయగల భారతదేశపు కేవలం రెండు సంస్థలలో ఒకటి.

గూగుల్ కంటే ముందే విశాఖపట్నం కాపులుప్పాడ వద్ద 50 ఎకరాల భూకేటాయింపు పొంది, సుమారు ₹5,500 కోట్ల పెట్టుబడితో 100 MW ఏఐ హైపర్స్కేలర్ డేటా సెంటర్ నిర్మించాలని ఉర్సా కంప్యూట్ ప్రతిపాదించింది. రాష్ట్ర పెట్టుబడుల ప్రోత్సాహక బోర్డు(SIPB), కేబినెట్ కూడా దీనికి ఆమోదం తెలిపాయి.

ది వైర్‌ తెలుగు ప్రచురించిన పరిశోధనాత్మక కథనాల తర్వాత ఉర్సా కంప్యూట్‌ కంపెనీకి ప్రకటించిన వరాలను ఆచరణలోకి తెచ్చే సాహసం చేయలేదు.

ఊరూపేరు లేని చిన్న కంపెనీలకు ఈ స్థాయిలో వనరులు, రాయితీలు కట్టబెట్టడం పెద్ద ఎత్తున రాజకీయ దుమారానికి దారి తీయడంతో రెండవ దశలో  గూగుల్-అదానీలాంటి భారీ కంపెనీలకు లక్షల కోట్లు విలువైన వనరులు, రాయితీలు కట్టబెట్టడానికి ప్రభుత్వం సిద్ధమైంది. ఉర్సా కేటాయింపులపై ధ్వజమెత్తిన వైసీపీ, గూగుల్-  అదానీ డేటా సెంటర్లపై కురిపిస్తున్న వరాల జల్లు విషయంలో వైసీపీ నోరెత్తకపోవడం గమనించాల్సిన విషయం.

ఇండియానాపోలిస్ తిరస్కరణ, విశాఖకు బదిలీ..

యూఎస్ఏలోని ఇండియానాపోలిస్ నగరంలో గూగుల్ నిర్మించతలపెట్టిన భారీ డేటా సెంటర్ ప్రాజెక్ట్‌ను (ప్రాజెక్ట్ ఫ్లో – Project Flo) స్థానిక ప్రజలు తీవ్రంగా నిరసించారు.

అక్కడ 470 ఎకరాల వ్యవసాయ భూమిని ఆక్రమిస్తూ, గ్రిడ్ విద్యుత్, తాగునీటి వ్యవస్థలను నాశనం చేయడానికి గూగుల్ వేసిన కుట్రను 2025 సెప్టెంబర్ 22న జరిగిన కౌన్సిల్ సమావేశంలో ప్రజలు భారీ ఆందోళనలతో తిప్పికొట్టారు.

దీంతో గూగుల్ తన ప్రతిపాదనను అక్కడి నుంచి ఉపసంహరించుకోవడానికి బలవంతంగా అంగీకరించింది.

కానీ ఆ విధంగా అమెరికన్లు తిరస్కరించిన పర్యావరణ వినాశక ప్రాజెక్ట్ ను ఆంధ్రప్రదేశ్ పాలకులు కల్పించిన సబ్సిడీలను, భూములను చూసి ఏరికోరి మన విశాఖపట్నానికి తరలించారు.

ఇది కేవలం ఒక పెట్టుబడి కాదు, ఇది ఒక అంతర్జాతీయ పర్యావరణ వ్యర్థాల బదిలీ లేదా “భౌగోళిక వ్యర్థాల బదిలీ” అని మేము స్పష్టం చేస్తున్నాము.

తీవ్ర జలదోపిడీ, తాగునీటి జలాశయాలపై దాడి..

డేటా సెంటర్ల శీతలీకరణ తీవ్రతను, వాటి సామర్థ్యాన్ని కొలవడానికి ఇంజనీరింగ్ విభాగంలో రెండు ప్రామాణిక కొలమానాలను ఉపయోగిస్తారు, అవి పవర్ యూసేజ్ ఎఫెక్టివ్ నెస్(PUE); వాటర్ యూసేజ్ ఎఫెక్టివ్ నెస్(WUE). ఈ సంబంధాన్ని క్రింది గణిత సూత్రాల ద్వారా వ్యక్తపరచవచ్చు:

$$PUE = \frac{\text{Total Facility Energy}}{\text{IT Equipment Energy}}$$

$$WUE = \frac{\text{Annual Water Usage}}{\text{IT Equipment Energy}}$$

సాధారణంగా ఒక మెగావాట్(MW) ఏఐ డేటా సెంటర్ సర్వర్లను చల్లబరచడానికి రోజుకు సగటున 68,500 లీటర్ల స్వచ్ఛమైన నీరు అవసరమవుతుంది.

ఈ లెక్కన ప్రతిపాదిత 1-GW గూగుల్-అదానీ డేటా సెంటర్ రోజువారీ నీటి వినియోగం అక్షరాలా 68.5 మిలియన్ లీటర్లకు చేరుకుంటుంది.

విశాఖపట్నం నగరం మొత్తం రోజువారీగా వాడే తాగునీటిలో(600 MLD) ఇది దాదాపు 11.4%కి సమానం.

ఆంధ్రప్రదేశ్ భూగర్భ జల వనరుల శాఖ గణాంకాల ప్రకారం, రాష్ట్రంలోనే అత్యల్పంగా కేవలం 2.12 TMC భూగర్భ జలాలు మాత్రమే మిగిలి ఉన్న తీవ్ర నీటి ఎద్దడి గల జిల్లా విశాఖపట్నం.

ఇటువంటి జల సంక్షోభంలో ఉన్న జిల్లాలో రోజుకు కోట్ల లీటర్ల నీటిని ఆవిరి చేసే ఈ పారిశ్రామిక జల రాక్షసులను అనుమతించడం తీవ్రమైన అన్యాయం.

ఈ జలదోపిడీ నేరుగా నగర ప్రజల దాహార్తిని తీర్చే ప్రధాన తాగునీటి వనరులైన ఏలేరు, ముదసర్లోవ, మేఘాద్రిగెడ్డ, రాయవాడ, తాటిపూడి జలాశయాలపై దాడి చేస్తోంది.

అంతేకాకుండా, ఈ సర్వర్లలో వాడే అత్యాధునిక సిలికాన్ మైక్రోచిప్ల తయారీ దశలోనే, ఒక్కో చిప్ ను శుభ్రం చేయడానికి దాదాపు 1.5 గ్యాలన్ల అల్ట్రా-ప్యూర్ నీరు అవసరమవుతుంది.

ఇది ప్రజల తాగునీటి హక్కులను పూర్తిగా హరించడమే అవుతుంది.

మత్స్యకారులకి వాటిల్లనున్న సమస్యలు, తీరప్రాంత విధ్వంసం..

ఈ డేటా సెంటర్ల స్థాపన వల్ల అత్యంత దారుణంగా నష్టపోయే మరో వర్గం మన మత్స్యకారులు.

ఈ భారీ సర్వర్లను చల్లబరచడానికి ప్రభుత్వం ప్రతిపాదించిన సముద్రపు నీటి కూలింగ్ పద్ధతి అత్యంత ప్రమాదకరమైనది.

సముద్రపు నీరు సర్వర్ల లోహాలను తినివేయకుండా ఉండటానికి చేసే డిసాలినేషన్ ప్రక్రియలో భారీ ఎత్తున అత్యంత వేడి, రసాయనాలతో కూడిన లవణ జలాలు విడుదలవుతాయి.

ఈ విషపూరిత లవణ జలాలను భీమిలి, రుషికొండ తీరంలోని సముద్రపు నీటిలోకి నేరుగా వదిలివేయడం వల్ల సముద్ర ఉష్ణోగ్రతలు అసాధారణంగా పెరుగుతాయి.

దీనివల్ల తీరానికి సమీపంలో ఉండే పగడపు దిబ్బలు, నాచు- చిన్న చేపల సంతానోత్పత్తి కేంద్రాలు పూర్తిగా నశించిపోతాయి.

సముద్రతీరం రసాయన కాలుష్యంతో నిండిపోవడం వల్ల చేపలు వలసపోతాయి, లేదా చనిపోతాయి.

దీనివల్ల దశాబ్దాలుగా సముద్రపు వేటపైనే ఆధారపడి బతుకుతున్న వేలాదిమంది సంప్రదాయ మత్స్యకారుల ఉపాధి పూర్తిగా దెబ్బతింటుంది.

వారు చేపల వేట కోసం సముద్రంలోకి మైళ్ల దూరం ప్రయాణించాల్సి వస్తుంది, ఇది వారి ఖర్చులను పెంచి వారిని మరింత పేదరికంలోకి నెట్టేస్తుంది.

పర్యావరణ వ్యవస్థ నాశనం కావడం వల్ల తీరప్రాంత గాలిలో తేమ శాతం తగ్గి, లవణీయత పెరిగి తీరప్రాంత ప్రజల వ్యవసాయ భూములు కూడా చవిటి నేలలుగా మారే ముప్పు ఉంది.

ఉష్ణోగ్రతల పెంపు, మైక్రోక్లైమేట్..

ఆంధ్రప్రదేశ్ ఇప్పటికే తీవ్రమైన పర్యావరణ మార్పులను ఎదుర్కొంటోంది. 2026 మే నెలాఖరులో కోస్తా ప్రాంతాలలో ఉష్ణోగ్రతలు అసాధారణంగా 44.3°C నుంచి 46°C కి చేరుకున్నాయి.

పల్నాడు జిల్లా అచ్చంపేటలో 44.3°C గరిష్ట ఉష్ణోగ్రత నమోదు కాగా, కావలిలో 43.9°C నమోదైంది.

భారత వాతావరణ శాఖ విడుదల చేసిన వాతావరణ బులెటిన్ ప్రకారం, నైరుతి రుతుపవనాల కాలంలో రాష్ట్రంలో సాధారణం కంటే తక్కువ వర్షపాతం నమోదవుతుందని, వడగాల్పుల రోజుల సంఖ్య మరింత పెరుగుతుందని హెచ్చరించింది.

ఈ వ్యాసం రెండు భాగాలుగా ప్రచురితమవుతోంది. ఇది మొదటి భాగం.

About the Author

Telugu staff

Administrator

View All Posts