కాలాన్ని శాసించిన శాస్త్రవేత్త చార్లెస్‌ డార్విన్‌

ప్రపంచ మానవజాతి చరిత్రలోనే ప్రముఖమైన శాస్త్రవేత్తలలో చార్లెస్ డార్విన్ ఒకరు. జీవ పరిణామ క్రమాన్ని విశ్లేషించి సిద్ధాంతీకరించిన మహోన్నత వ్యక్తి. ఫిబ్రవరి 12న ఆయన జయంతి.

73 సంవత్సరాలు జీవించిన డార్విన్ 1882 ఏప్రిల్‌లో మరణించారు. తను 73 సంవత్సరాల జీవితంలో అర్థ శతాబ్ద కాలం పరిశోధనలకు వెచ్చించారు.

పలు అంశాలపై సిద్ధాంతీకరణల ద్వారా ప్రపంచ మానవాళికి, భవిష్యత్ శాస్త్రవేత్తలకు ఒక దార్శనికుడు అయ్యారు.

ఆయన మరణించిన నూట నలభై సంవత్సరాల తర్వాత నేటి మనువాదులు(ఆర్‌ఎస్‌ఎస్‌) ఆయన సిద్ధాంతం మీద దాడి చేస్తున్నారు.

సమాజ పురోగమనానికి దోహదపడే ప్రతి పరిశోధనా చర్య ల మీద ఆది నుంచి రకరకాల శక్తులు దాడి చేయడం మానవ చరిత్రలో సర్వసాధారణమైపోయింది. ఈ సందర్భంగా డార్విన్ పుట్టుక, జీవితం, వారి పరిశోధనలు సంక్షిప్తంగా తెలుసుకుందాం.

అవగాహనను మార్చేసిన డార్విన్

మానవ చరిత్రలో అత్యంత ప్రభావవంతమైన శాస్త్రవేత్తలలో చార్లెస్ డార్విన్ ఒకరు. ‘ప్రకృతి వరణం'(Natural Selection) ద్వారా ఆయన ప్రతిపాదించిన పరిణామ సిద్ధాంతం భూమిపై జీవం పట్ల అవగాహనను పూర్తిగా మార్చివేసింది.

డార్విన్‌కు ముందు, ప్రపంచంలోని అన్ని జీవజాతులు ఎలా సృష్టించబడ్డాయో అలాగే ఉంటాయని; అవి ఎప్పటికీ మారవని చాలామంది నమ్మేవారు. కానీ, జీవులు సుదీర్ఘ కాలం పాటు క్రమంగా మారుతాయని; అన్ని జాతులకు ఉమ్మడి పూర్వీకులు ఉంటారని డార్విన్ నిరూపించారు.

ఆయన పరిశోధనలు కేవలం జీవశాస్త్రాన్నే కాకుండా తత్వశాస్త్రం, మతం, మనస్తత్వశాస్త్రం, సామాజిక ఆలోచనలను కూడా ప్రభావితం చేశాయి.

జీవితం, పరిశీలనలు- సిద్ధాంతం

చార్లెస్ రాబర్ట్ డార్విన్ 1809 ఫిబ్రవరి 12న ఇంగ్లాండ్‌లోని ష్రూస్‌బరీలో జన్మించారు. ఆయన ఒక విద్యావంతులైన సంపన్న కుటుంబం నుంచి వచ్చారు. ఆయన తండ్రి డాక్టర్ రాబర్ట్ డార్విన్. ప్రఖ్యాత వైద్యుడు. ఆయన తాత ఎరాస్మస్ డార్విన్ ప్రసిద్ధ శాస్త్రవేత్త, కవి.

చిన్నప్పటి నుంచే డార్విన్‌కు ప్రకృతి అంటే చాలా ఇష్టం. మొక్కలు, కీటకాలు, గవ్వలు, రాళ్లను సేకరించడం ఆయనకు అలవాటు.

అయితే, ఆయనకు పాఠశాల చదువులపై అంతగా ఆసక్తి ఉండేది కాదు. తన కుమారుడిని వైద్యుడిని చేయాలని డార్విన్ను ఆయన తండ్రి ఎడిన్‌బరో(ప్రస్తుతం స్కాట్లాండ్ రాజధాని) విశ్వవిద్యాలయానికి పంపారు. కానీ డార్విన్‌కు శస్త్రచికిత్సలు అంటే ఇష్టం లేకపోయేది. రక్తాన్ని చూడలేకపోయేవారు.

తర్వాత, మతగురువు కావాలనే ఉద్దేశంతో కేంబ్రిడ్జ్‌లోని క్రైస్ట్స్ కాలేజీలో డార్విన్ చేరారు. అక్కడ ఉన్నప్పుడు ఆయనకు ప్రకృతి చరిత్ర, భూగర్భ శాస్త్రం(Geology)పై తీవ్రమైన ఆసక్తి కలిగింది.

హెచ్ఎమ్ఎస్ బీగిల్ ప్రయాణం

1831లో డార్విన్ జీవితాన్ని మలుపు తిప్పే ఒక అవకాశం వచ్చింది. ‘హెచ్ఎమ్ఎస్ బీగిల్’ అనే నౌకలో ఐదు సంవత్సరాల శాస్త్రీయ యాత్రలో పాల్గొనవలసిందిగా ఆయనకు ఆహ్వానం అందింది. ఈ నౌక ప్రధాన ఉద్దేశ్యం దక్షిణ అమెరికా తీరాలను సర్వే చేయడం. డార్విన్ ఒక ప్రకృతి శాస్త్రవేత్తగా(Naturalist) ఆ ప్రయాణంలో చేరారు.

ఈ యాత్రలో బ్రెజిల్, అర్జెంటీనా, చిలీ, గాలాపాగోస్ దీవులు, ఆస్ట్రేలియా, దక్షిణ ఆఫ్రికా వంటి అనేక ప్రాంతాలను డార్విన్ సందర్శించారు. ఆయన ప్రకృతిని నిశితంగా పరిశీలిస్తూ వేలాది మొక్కలు, జంతువులు, శిలాజాలు, రాళ్లను సేకరించారు.

దక్షిణ అమెరికాలో పరిశీలనలు

దక్షిణ అమెరికాలో డార్విన్ అంతరించిపోయిన భారీ జంతువుల శిలాజాలను(ఉదాహరణకు మెగాథెరియం- ఒక రకమైన భారీ స్లోత్) కనుగొన్నారు.

ఈ శిలాజాలు అదే ప్రాంతంలో నివసిస్తున్న జీవులను పోలి ఉండటం ఆయనను ఆశ్చర్యపరిచింది. జీవజాతులు కాలక్రమేణా మారవచ్చా అనే సందేహం ఆయనలో కలిగింది.

గాలాపాగోస్ దీవులు

పసిఫిక్ మహాసముద్రంలోని గాలాపాగోస్ దీవులలో ఆయన చేసిన పరిశీలనలు అత్యంత ముఖ్యమైనవి. అక్కడ ఉన్న ‘ఫించ్'(Finches) అనే చిన్న పక్షులలో రకరకాల జాతులు ఉండటాన్ని ఆయన గమనించారు.

ఆ పక్షులన్నీ చూడటానికి ఒకేలా ఉన్నప్పటికీ, వాటి ముక్కుల ఆకారం- పరిమాణంలో తేడాలు ఉన్నాయి. కొన్ని పక్షులకు గింజలను పగలగొట్టడానికి బలమైన ముక్కులు ఉంటే, మరికొన్నింటికి కీటకాలను తినడానికి సన్నని ముక్కులు ఉన్నాయి.

విభిన్న దీవులలో లభించే ఆహార వనరులకు అనుగుణంగా, ఒకే పూర్వీకుడి నుంచి వచ్చిన ఈ పక్షులు కాలక్రమేణా మారాయని డార్విన్ గ్రహించారు.

పరిణామ సిద్ధాంతం అభివృద్ధి

1836లో ఇంగ్లాండ్‌కు తిరిగి వచ్చిన తర్వాత, డార్విన్ తన పరిశీలనలను విశ్లేషించడానికి 20 ఏళ్లకు పైగా సమయం కేటాయించారు. జనాభా పెరుగుదల గురించి ఆర్థికవేత్త థామస్ మాల్థస్ రాసిన పుస్తకం డార్విన్‌ను బాగా ప్రభావితం చేసింది. ఆహార సరఫరా కంటే జనాభా వేగంగా పెరుగుతుందని, దీనివల్ల మనుగడ కోసం పోటీ ఏర్పడుతుందని మాల్థస్ ప్రతిపాదించారు.

డార్విన్ ఈ ఆలోచనను ప్రకృతికి అన్వయించారు. జీవులన్నీ మనుగడ సాగించగలిగే దానికంటే ఎక్కువ సంతానాన్ని ఉత్పత్తి చేస్తాయని; అందువల్ల ఆహారం, నీరు, నివాసం కోసం వాటి మధ్య నిరంతరం ‘మనుగడ కోసం పోరాటం’ జరుగుతుందని ఆయన గ్రహించారు.

ప్రకృతి వరణం ద్వారా పరిణామ సిద్ధాంతం

డార్విన్ సిద్ధాంతాన్ని కొన్ని కీలక సూత్రాల ద్వారా అర్థం చేసుకోవచ్చు

వైవిధ్యం: ఒకే జాతికి చెందిన జీవులన్నీ ఒకేలా ఉండవు. వాటి పరిమాణం, రంగు, బలం, వేగంలో తేడాలు ఉంటాయి. ఈ వైవిధ్యాలు తల్లిదండ్రుల నుంచి పిల్లలకు అందుతాయి.

అధిక సంతానోత్పత్తి: జీవులు మనుగడ సాగించే స్థాయి కంటే ఎక్కువ సంతానాన్ని పునరుత్పత్తి చేస్తాయి. ఉదాహరణకు, ఒక చేప వేలాది గుడ్లు పెడుతుంది, కానీ కొన్ని మాత్రమే పెరిగి పెద్దవవుతాయి.

మనుగడ కోసం పోరాటం: వనరులు పరిమితంగా ఉండటం వల్ల జీవుల మధ్య పోటీ ఉంటుంది.

యోగ్యతమ జీవనం(Survival of the Fittest): పరిసరాలకు అనుగుణంగా అనుకూలమైన లక్షణాలు ఉన్న జీవులు మాత్రమే మనుగడ సాగించి, సంతానాన్ని వృద్ధి చేస్తాయి. ఇక్కడ ‘ఫిట్టెస్ట్’ అంటే అత్యంత బలవంతులు అని కాదు, ఆ వాతావరణానికి బాగా అలవాటు పడినవి అని అర్థం.

ప్రకృతి వరణం: ప్రకృతి ప్రయోజనకరమైన లక్షణాలు ఉన్న జీవులను “ఎంపిక” చేస్తుంది. ఈ లక్షణాలు తరువాతి తరాలకు అందుతాయి. కొన్ని వేల తరాల తర్వాత, ఈ చిన్న మార్పులు పేరుకుపోయి కొత్త జాతులు ఏర్పడతాయి.

పరిణామం అంటే ఏమిటి?

పరిణామం అంటే జీవులలో సుదీర్ఘ కాలం పాటు సంభవించే క్రమబద్ధమైన మార్పు.

డార్విన్ ప్రకారం, భూమిపై ఉన్న అన్ని జీవజాతులు ఒకదానికొకటి సంబంధం కలిగి ఉన్నాయి.

ఉదాహరణకు, మానవులు, కోతులు ఒకే ఉమ్మడి పూర్వీకుడి నుండి వచ్చారు.

పరిణామం అనేది ఒక్కరోజులో జరిగేది కాదు; ఇది లక్షలాది సంవత్సరాల పాటు చాలా నెమ్మదిగా జరుగుతుంది.

“ఆన్ ది ఆరిజిన్ ఆఫ్ స్పీసీస్” ప్రచురణ

1859లో డార్విన్ తన ప్రసిద్ధ పుస్తకం “ఆన్ ది ఆరిజిన్ ఆఫ్ స్పీసీస్ బై మీన్స్ ఆఫ్ నేచురల్ సెలక్షన్”ను ప్రచురించారు.

పరిణామం ఎలా జరుగుతుందో బలమైన ఆధారాలతో ఈ పుస్తకం వివరించింది. ఇది ప్రపంచవ్యాప్తంగా సంచలనం సృష్టించింది. మానవులు, జంతువులు ఒకే పూర్వీకుల నుండి వచ్చాయనే ఆలోచనను అప్పట్లో చాలామంది వ్యతిరేకించారు.

సిద్ధాంతానికి మద్దతునిచ్చే ఆధారాలు

డార్విన్ కాలంలో జన్యువులు లేదా డీఎన్‌ఏ గురించి తెలియకపోయినా, ఆయన సిద్ధాంతానికి అనేక ఆధారాలు లభించాయి:

శిలాజ ఆధారాలు: పూర్వం నివసించిన జీవులు కాలక్రమేణా ఎలా మారాయో శిలాజాలు తెలియజేస్తాయి. ఉదాహరణకు, గుర్రాల పరిమాణం క్రమంగా పెరగడాన్ని శిలాజాల ద్వారా చూడవచ్చు.

తులనాత్మక శరీర నిర్మాణ శాస్త్రం

విభిన్న జంతువుల శరీర నిర్మాణాలు ఒకేలా ఉండటం. ఉదాహరణకు మనిషి చేయి, తిమింగలం ఫ్లిప్పర్, గబ్బిలం రెక్క, పిల్లి కాలు అన్నీ ఒకే రకమైన ఎముకల నిర్మాణాన్ని కలిగి ఉంటాయి. వీటిని ‘సమజాత అవయవాలు’ అంటారు.

పిండోత్పత్తి శాస్త్రం: వేర్వేరు జాతుల పిండాలు ప్రారంభ దశలో ఒకేలా కనిపిస్తాయి, ఇది ఉమ్మడి పూర్వీకతను సూచిస్తుంది.

జన్యుశాస్త్రం(Genetics): ఆధునిక సైన్స్ ప్రకారం, జీవుల మధ్య ఉండే డీఎన్‌ఏ పోలికలు డార్విన్ ఆలోచనలను ధృవీకరిస్తున్నాయి. మానవులు, చింపాంజీలు తమ డీఎన్‌ఏలో సుమారు 98–99% పోలికను కలిగి ఉంటాయి.

విమర్శలు అపార్థాలు

డార్విన్ సిద్ధాంతం అనేక విమర్శలను ఎదుర్కొంది.

వంశపారంపర్యతపై అవగాహన లేకపోవడం: లక్షణాలు ఒక తరం నుంచి మరో తరానికి ఎలా వెళ్తాయో డార్విన్ వివరించలేకపోయారు. తర్వాత జన్యుశాస్త్రం దీనికి సమాధానం ఇచ్చింది.

మతపరమైన అభ్యంతరాలు

దేవుడు ప్రతి జాతిని విడివిడిగా సృష్టించాడనే నమ్మకానికి ఇది విరుద్ధంగా ఉందని కొందరు భావించారు.

సామాజిక డార్వినిజం: కొందరు డార్విన్ సిద్ధాంతాన్ని జాత్యహంకారం, సామాజిక అసమానతలను సమర్థించుకోవడానికి తప్పుగా ఉపయోగించారు. డార్విన్ స్వయంగా అటువంటి ఆలోచనలను ఎప్పుడూ సమర్థించలేదు.

చార్లెస్ డార్విన్ ప్రతిపాదించిన పరిణామ సిద్ధాంతం ఆధునిక జీవశాస్త్రానికి పునాది. భూమి మీద జీవం ఎలా ఆవిర్భవించింది? ఎలా అభివృద్ధి చెందిందనే అంశంపై ఇది చాలా ఖచ్చితమైన వివరణను ఇస్తుంది.

డార్విన్ చూపిన నిశిత పరిశీలన, సాక్ష్యాధారాల ఆధారిత తర్కం; శాస్త్రీయ నిజాయితీ ఆయనను ప్రపంచ చరిత్రలోనే గొప్ప వ్యక్తిగా నిలబెట్టాయి.

డార్విన్ 1882 ఏప్రిల్ 19న మరణించారు. ఆయన చేసిన సేవలకు గుర్తింపుగా లండన్‌లోని ‘వెస్ట్‌మిన్‌స్టర్ అబ్బే’లో ఆయన అంత్యక్రియలు నిర్వహించారు. నేటికీ, ఆయన సిద్ధాంతం వైద్యం, పర్యావరణ శాస్త్రం, జన్యు పరిశోధనలలో కీలక పాత్ర పోషిస్తోంది.

About the Author

R Lakshmaiah

View All Posts