విద్య సమాజాన్ని సమానత్వం వైపు నడిపించే మౌలిక సాధనం. అయితే దేశంలో అనేక ప్రైవేట్ యూనివర్సిటీలు విద్యను వ్యాపారంగా మార్చి, విద్యార్థులను లాభాల సాధనంగా ఉపయోగిస్తున్నాయి.
ఈ ప్రమాదకర ధోరణికి తిరుపతి సమీపంలోని మోహన్ బాబు యూనివర్సిటీ స్పష్టమైన ఉదాహరణగా నిలుస్తోంది.
ఈ యూనివర్సిటీలో కొనసాగుతున్న బలవంతపు ఫీజు వసూళ్లు, వివక్షాపూరిత చర్యలు, బెదిరింపులు- విద్యార్థుల భవిష్యత్తును మాత్రమే కాకుండా, రాష్ట్రంలోని ఉన్నత విద్యా పాలన విశ్వసనీయతను కూడా ప్రశ్నార్థకంగా మారుస్తున్నాయి.
ప్రత్యేకంగా ఈఏపీసీఈటీ కన్వీనర్ కోటా మెరిట్ ఆధారంగా చేరిన, ఆర్థికంగా వెనుకబడిన విద్యార్థులను లక్ష్యంగా చేసుకుని యాజమాన్యం ఫీజుల భారం మోపుతోంది.
మెస్ ఫీజులు, ప్లేస్మెంట్ ట్రైనింగ్ ఫీజులు అనే పేర్లతో ఎలాంటి చట్టబద్ధమైన ఉత్తర్వులు లేకుండా వేల రూపాయలు వసూలు చేస్తూ; హాజరు, పరీక్షలు, ప్లేస్మెంట్ల నుంచి ఫీజులు చెల్లించని విద్యార్థులను దూరం పెడుతోంది. ఈ చర్యలు “విద్య అందరికీ” అనే రాజ్యాంగ స్ఫూర్తికి పూర్తిగా విరుద్ధం.
అక్రమ అదనపు ఫీజులు
2025 అక్టోబర్లో, ఈ సంస్థ అక్రమాలపై ఆంధ్రప్రదేశ్ హయ్యర్ ఎడ్యుకేషన్ రెగ్యులేటరీ అండ్ మానిటరింగ్ కమిషన్(ఏపీహెచ్ఈఆర్ఎంసీ) చేసిన దర్యాప్తు అత్యంత కీలకమైనది.
2022–2024 మధ్య కాలంలో రూ 26.17 కోట్ల మేర అక్రమ అదనపు ఫీజులు వసూలు చేసినట్టు దర్యాప్తు నివేదిక స్పష్టం చేసింది.
మెస్ ఫీజులు, కెరీర్ డెవలప్మెంట్ ఫీజులు, హాజరు మానిప్యులేషన్ వంటి అంశాలపై కఠిన ఆరోపణలు నమోదు చేసి, యూనివర్సిటీపై జరిమానా విధించి, ఫీజులు రీఫండ్ చేయాలని, అవసరమైతే గుర్తింపు రద్దు చేయాలని సిఫార్సు చేసింది.
చర్యలు తీసుకోని ప్రభుత్వం
ఆంధ్రప్రదేశ్ రాష్ట్ర ప్రభుత్వానికి అధికారికంగా ఈ నివేదికను సమర్పించినప్పటికీ, ఇప్పటివరకు మోహన్ బాబు యూనివర్సిటీపై ఎటువంటి ప్రభావవంతమైన చర్యలు తీసుకోకపోవడం రాష్ట్ర ప్రభుత్వ ఘోర వైఫల్యానికి నిదర్శనం.
ఈ నిశ్శబ్దం యాదృచ్ఛికం కాదు; ఇది యాజమాన్యానికి రక్షణ కల్పిస్తున్నట్టుగా కనిపిస్తోంది. దీని వల్ల యూనివర్సిటీ యాజమాన్యం మరింత ధైర్యంగా అక్రమాలను కొనసాగిస్తోంది.
దేశంలోని ఇతర రాష్ట్రాల్లో ప్రైవేట్ యూనివర్సిటీల అక్రమాలపై అనేక సందర్భాల్లో రాష్ట్ర ప్రభుత్వాలు కఠినంగా జోక్యం చేసుకుని, యూనివర్సిటీ యాజమాన్యాలను పక్కన పెట్టి, పరిపాలనను స్వాధీనం చేసుకున్న ఉదాహరణలు ఉన్నాయి.
రెగ్యులేటరీ సంస్థల నివేదికలను ఆధారంగా చేసుకుని- అడ్మిషన్లు నిలిపివేయడం, ఫీజు వసూళ్లను ఫ్రీజ్ చేయడం, పాలక మండళ్లను రద్దు చేసి ప్రభుత్వ అధికారులతో ప్రత్యేక కమిటీలను ఏర్పాటు చేయడం వంటి చర్యలు తీసుకున్న సందర్భాలు దేశవ్యాప్తంగా కనిపిస్తాయి.
“హ్యాండోవర్”కు దిగిన ఇతర రాష్ట్రాలు
కొన్ని రాష్ట్రాల్లో అయితే ప్రైవేట్ యూనివర్సిటీలలో తీవ్ర ఆర్థిక అక్రమాలు, విద్యార్థుల హక్కుల ఉల్లంఘనలు నిర్ధారణ కావడంతో, ప్రభుత్వం నేరుగా పరిపాలనా బాధ్యతను చేపట్టి, యూనివర్సిటీ నిర్వహణను తాత్కాలికంగా ప్రభుత్వ నియంత్రణలోకి తీసుకుంది. ఇది “హ్యాండోవర్” అనే మాటకు అక్షరార్థం.
విద్యా నైతికతను యాజమాన్యం విస్మరించినప్పుడు, విద్యార్థుల భవిష్యత్తును కాపాడే బాధ్యత ప్రభుత్వానిదే అన్న సూత్రాన్ని అక్కడి ప్రభుత్వాలు అమలు చేశాయి.
అయితే, అదే సమయంలో ఆంధ్రప్రదేశ్లో మాత్రం భిన్నమైన దృశ్యం కనిపిస్తోంది.
ఏపీహెచ్ఈఆర్ఎంసీలాంటి చట్టబద్ధ సంస్థ స్పష్టమైన అక్రమాలను నిర్ధారించినప్పటికీ, రాష్ట్ర ప్రభుత్వం చర్యలు తీసుకోకపోవడం వల్ల మోహన్ బాబు యూనివర్సిటీ యాజమాన్యం చట్టాలకంటే తామే గొప్పవారన్న భావనతో వ్యవహరిస్తోంది.
ఇది ఒకే యూనివర్సిటీ సమస్య కాదు; ఇది రాష్ట్రంలోని అన్ని ప్రైవేట్ యూనివర్సిటీలకు “చట్టాలు అమలవ్వవు” అనే ప్రమాదకర సంకేతాన్ని పంపిస్తోంది.
ప్రభుత్వ నిర్లక్ష్యానికి ఫలితాలు
ఫీజు వసూళ్లను అమలు చేయడానికి హాజరు వ్యవస్థను ఆయుధంగా మార్చుకోవడం, ప్లేస్మెంట్ ఫీజుల పేరుతో పేద విద్యార్థులపై భారం మోపడం, థర్డ్ పార్టీ యాప్ల ద్వారా పారదర్శకత లేని లావాదేవీలు ఇవన్నీ రాష్ట్ర ప్రభుత్వ నిర్లక్ష్యానికి ప్రత్యక్ష ఫలితాలు. ప్రభుత్వం కఠినంగా స్పందించి ఉంటే, ఇవి ఈ స్థాయిలో కొనసాగేవి కావు.
దేశంలోని ఇతర రాష్ట్రాల్లో ప్రభుత్వాలు చేసినట్టుగా, ఆంధ్రప్రదేశ్ ప్రభుత్వం ఎందుకు ముందుకు రావడం లేదు? ఏపీహెచ్ఈఆర్ఎంసీ నివేదికను ఎందుకు అమలు చేయడం లేదు? అక్రమంగా వసూలు చేసిన రూ 26.17 కోట్లను ఎందుకు విద్యార్థులకు తిరిగి ఇప్పించడం లేదు? ఈ ప్రశ్నలకు సమాధానం చెప్పాల్సిన బాధ్యత రాష్ట్ర ప్రభుత్వానిదే.
విద్య హక్కు- రాజ్యాంగం హామీ ఇచ్చిన మౌలిక హక్కు. ఆ హక్కును కాపాడాల్సిన బాధ్యతను విస్మరించిన ప్రభుత్వం చరిత్ర ముందు బాధ్యత వహించాల్సిందే.
మోహన్ బాబు యూనివర్సిటీలో జరుగుతున్న అక్రమాలు, వాటిపై రాష్ట్ర ప్రభుత్వ మౌనం— ఇవన్నీ కలిపి చూస్తే ఇది కేవలం పరిపాలనా వైఫల్యం కాదు, విద్యార్థుల పట్ల జరిగిన స్పష్టమైన ద్రోహంగా మిగిలిపోతుంది. ఇప్పటికైనా ప్రభుత్వం మేల్కొని చర్యలు తీసుకోకపోతే, ఈ వైఫల్యం రాష్ట్ర చరిత్రలో మచ్చగా నిలిచిపోతుంది.
About the Author
Discover more from The Wire Telugu
Subscribe to get the latest posts sent to your email.
