ఏ కథా ముగిసిపోదు!

1
కదిలే మేఘం,
తిరిగే భూమండలం,
కరిగే మంచు పర్వతం,
వడిగా సాగే నదీ నదం;

ఎగిరే పావురం,
నర్తించే మయూరం,
గాలికి ఊగే పంటపొలం,
ఆగక నడిచే కాల్బలం;

ఉదయించే రవి కిరణం
అస్తమించని శశి నయనం..

ప్రియ నేస్తాలుగా
నా హృదిలో పొదువుకొని
పయనం సాగిస్తున్నా!!

2
ఒక్కో మెట్టు ఎక్కినప్పుడు
తరువాతి మెట్టు ఎంత ఎత్తుందో..

ఇంకెంత ఎ‘దిగితే’
అదికూడా ఎక్కగలనో.. అనుకుంటూ కదులుతూనే ఉన్నా!

3
ఎంతో కాలం గరళాన్ని
అంతర్గత ఆటుపోట్లలో
అదిమిపట్టిన సముద్రపు జడి..

ప్రకృతి ధర్మంగా
ప్రాకృత మర్మంగా
బాధాపూరిత బాధ్యతతో..

ఏటవాలులను సరిచేసే
చైతన్యపు భావధారతో
విరుచుకుపడే కెరటాల
ఆరాటంలో నేనున్నా!

4
కసిరించిన, విసిగించిన
ఏ బాధైనా ముగిసిపోదా!?
ముగిసిన ప్రతి పురాగాథా
మళ్ళీ కొత్త కాంతులతో చిగురించదా!?

ఏ కాలంలోనైనా..
ఏ కథా ముగిసిపోదు!

ఎందుకంటే…
ఇదే మొదలు కాదు;
ఇది చివరిది అసలే కాదు!!

About the Author

Giridhar

View All Posts