న్యూయార్క్ నగర మేయర్ జోహ్రాన్ మమ్దానీ నగర ఆర్థికాభివృద్ధి సంస్థ(ఎకనామిక్ డెవలప్మెంట్ కార్పొరేషన్ – ఈడీసీ)కు కొత్త అధ్యక్షుడిని ఎంపిక చేసే ప్రక్రియలో ప్రభుత్వ పరిపాలనలో అనుభవం ఉన్న వ్యక్తికి ప్రాధాన్యం ఇస్తున్నట్లు తెలుస్తోంది.
ఈ పదవికి ప్రధానంగా పరిశీలనలో ఉన్న వ్యక్తి ఆంథోనీ షోరిస్. ఆయన గతంలో మాజీ మేయర్ బిల్ డి బ్లాసియో ప్రభుత్వంలో ఉప మేయర్గా పనిచేశారు.
ప్రస్తుతం ప్రపంచ ప్రఖ్యాత కన్సల్టింగ్ సంస్థ మెకిన్సీ అండ్ కంపెనీలో భాగస్వామిగా ఉన్నారు. నియామక ప్రక్రియకు సంబంధించిన సమాచారం తెలిసిన పలువురు వ్యక్తులు ఈ విషయాన్ని వెల్లడించారని న్యూయార్క్ టైమ్స్ పేర్కొన్నది.
ఎందుకు ఈ ఎంపిక?
మమ్దానీని వ్యాపార వర్గాలు మొదటి నుంచి అనుమానంతో చూస్తున్నాయి. ఆయన సామ్యవాద భావజాలాన్ని అనుసరించే నాయకుడు. అందువల్ల నగర అభివృద్ధి సంస్థ ఇప్పటివరకు అమలు చేసిన విధానాలను ఆయన పూర్తిగా మార్చేస్తారనే ఆందోళన వ్యాపార వర్గాలలో ఉంది.
ఈడీసీ ఇప్పటివరకు ప్రధానంగా రియల్ ఎస్టేట్ పెట్టుబడులను ప్రోత్సహించడం, పన్ను రాయితీలు ఇవ్వడం, ప్రైవేటు పెట్టుబడులను ఆకర్షించడం, ఉద్యోగాలను పెంచడం, కొత్త పరిశ్రమలను నగరానికి తీసుకురావడం వంటి కార్యక్రమాలను నిర్వహిస్తోంది.
అలాంటి సమయంలో వ్యాపార వర్గాలకు పరిచయం ఉన్న, పరిపాలనా అనుభవం కలిగిన ఆంథోనీ షోరిస్ను నియమించడం ద్వారా ఆ వర్గాలకు భరోసా కల్పించాలనే ప్రయత్నంగా ఈ నిర్ణయాన్ని విశ్లేషిస్తున్నారు.
మమ్దానీ రాజకీయ సిద్ధాంతం..
మమ్దానీ డెమోక్రాటిక్ సోషలిస్ట్స్ ఆఫ్ అమెరికా(డీఎస్ఏ) సంస్థ సభ్యుడు. ఆ సంస్థ మద్దతుతోనే ఆయన మేయర్ ఎన్నికల్లో విజయం సాధించారు.
ఆయన సిద్ధాంతం ప్రకారం, పెట్టుబడిదారీ విధానం సమాజంలోని సంపదను కొద్దిమంది యజమానుల చేతుల్లో కేంద్రీకరిస్తుంది.
కార్మికుల శ్రమ ద్వారా వచ్చిన లాభాలను యజమానులు స్వాధీనం చేసుకుంటారు. దానికి బదులుగా సాధారణ ప్రజల అవసరాలకు ప్రాధాన్యం ఇచ్చే సమాజాన్ని నిర్మించాలి.
అయితే ఈడీసీ లక్ష్యం మాత్రం ప్రధానంగా ఆర్థిక వృద్ధిని ప్రోత్సహించడం. అందువల్ల మమ్దానీ రాజకీయ సిద్ధాంతం, సంస్థ సంప్రదాయ బాధ్యతల మధ్య కొంత భిన్నత కనిపిస్తోందని న్యూయార్క్ టైమ్స్ కథనం పేర్కొంది.
బాధ్యతలు చేపట్టిన వెంటనే తీసుకున్న చర్యలు..
మమ్దానీ పదవీ బాధ్యతలు చేపట్టిన మరుసటి రోజే నగర ఉప మేయర్ జూలీ సూ ఒక అంతర్గత నోటు జారీ చేశారు. అందులో ఈడీసీ అమలు చేస్తున్న ప్రతి కార్యక్రమాన్ని పునఃసమీక్షించాలని, కేవలం ఆర్థికాభివృద్ధి మాత్రమే కాకుండా సామాజిక న్యాయాన్ని కూడా పరిగణనలోకి తీసుకోవాలని, సంస్థ కార్యకలాపాలను కొత్త దృక్పథంతో పరిశీలించాలని సూచించారు.
గతంలో ఈడీసీ పాత్ర..
మైఖేల్ బ్లూమ్బర్గ్ మేయర్గా ఉన్నప్పుడు ఈడీసీ ప్రముఖమైన హడ్సన్ యార్డ్స్ అభివృద్ధి ప్రాజెక్టులో కీలక పాత్ర పోషించింది.
ఆ ప్రాజెక్టుకు భారీ పన్ను రాయితీలు ఇవ్వడం ద్వారా విలాసవంతమైన గృహాలు, వాణిజ్య సముదాయాలు, పెద్ద రియల్ ఎస్టేట్ అభివృద్ధి జరిగింది.
తర్వాత బిల్ డి బ్లాసియో హయాంలో అమెజాన్ సంస్థ రెండో ప్రధాన కార్యాలయాన్ని న్యూయార్క్లోని క్వీన్స్లో ఏర్పాటు చేయాలని ప్రభుత్వం ప్రయత్నించింది. అయితే ప్రజల నిరసనల కారణంగా ఆ ప్రణాళిక విఫలమైంది.
కొత్త అధ్యక్షుడి ఎంపికలో ఆలస్యం..
గత ఆరు నెలలుగా ఈడీసీకి కొత్త అధ్యక్షుడిని ఎంపిక చేయడం నగర పాలకులకు పెద్ద సవాలుగా మారింది.
దాదాపు పది మందికి పైగా అభ్యర్థులను పరిశీలించారు. వారిలో కొందరు వ్యాపార అనుకూల వైఖరి కలిగినవారు కాగా, మరికొందరు వినియోగదారుల హక్కుల కోసం పనిచేసినవారు ఉన్నారు.
ఎవరిని ఎంపిక చేయాలనే అంశంపై నగర పాలకుల్లో విభేదాలు ఏర్పడటంతో సంస్థకు శాశ్వత అధ్యక్షుడు లేకుండా గడిచింది. ప్రస్తుతం జీనీ పార్క్ తాత్కాలిక అధ్యక్షురాలిగా బాధ్యతలు నిర్వహిస్తున్నారు.
మమ్దానీ ఇటీవల ఒక ఇంటర్వ్యూలో మాట్లాడుతూ, అధ్యక్షుడి ఎంపిక చివరి దశకు చేరుకుందని, ఆర్థికాభివృద్ధిని కొత్త కోణంలో ముందుకు తీసుకెళ్లగల నాయకుడిని ఎంపిక చేయాలని లక్ష్యంగా పెట్టుకున్నామని, గతంలో కనిపించిన అభివృద్ధి నమూనాలను దాటి మరింత సమగ్రమైన అభివృద్ధి సాధించాలనుకుంటున్నామని చెప్పారు.
ఆంథోనీ షోరిస్ అనుభవం..
షోరిస్కు ప్రభుత్వ పరిపాలన, రాజకీయ వ్యవహారాలు, వ్యాపార రంగంలో విస్తృత అనుభవం ఉంది. డి బ్లాసియో ప్రభుత్వంలో మొదటి ఉప మేయర్గా పనిచేశారు. రెండు డజన్లకు పైగా నగర శాఖలను పర్యవేక్షించారు.
విద్యాశాఖ సహా అనేక విభాగాలను సమన్వయం చేశారు. ప్రీ-కిండర్గార్టెన్ విద్యా విస్తరణలో కీలక పాత్ర పోషించారు.
అలాగే, పోర్ట్ అథారిటీ ఆఫ్ న్యూయార్క్ అండ్ న్యూజెర్సీకు కూడా నాయకత్వం వహించారు. మాజీ మేయర్ ఎడ్వర్డ్ కొచ్ ప్రభుత్వంలో కమిషనర్గా పనిచేశారు. కార్మిక సంఘ ఆరోగ్య నిధికి కన్సల్టెంట్గా కూడా సేవలందించారు.
వ్యాపార వర్గాల ఆందోళన..
కొత్త అధ్యక్షుడి నియామకం ఆలస్యం కావడంతో రియల్ ఎస్టేట్ రంగం, పెట్టుబడిదారులు, వ్యాపార సంస్థలు ఆందోళన వ్యక్తం చేస్తున్నాయి.
మమ్దానీ ఆర్థికాభివృద్ధికి తగిన ప్రాధాన్యం ఇవ్వడం లేదని వారు భావిస్తున్నట్లు కథనం చెబుతోంది.
కార్మిక సంఘాల అభిప్రాయం..
గ్రెగొరీ మోరిస్, న్యూయార్క్ సిటీ ఎంప్లాయ్మెంట్ అండ్ ట్రైనింగ్ కోయలిషన్ ప్రధాన కార్యనిర్వాహకుడు మాట్లాడుతూ, ఈడీసీ మళ్లీ ఉద్యోగాల సృష్టి, ఆర్థికాభివృద్ధి, ప్రజలకు ప్రత్యక్ష ప్రయోజనం కలిగించే పెట్టుబడులపై దృష్టి పెట్టాలని అన్నారు.
అదే సమయంలో డెమోక్రాటిక్ సోషలిస్ట్స్ ఆఫ్ అమెరికా(డీఎస్ఏ) నాయకత్వంలోని కొందరు మాత్రం ఈడీసీ ఇప్పటివరకు ధనికులకు మాత్రమే ఉపయోగపడిందని విమర్శిస్తున్నారు.
వారి అభిప్రాయం ప్రకారం, ఇకపై సంస్థ దృష్టి కార్మికులకు అనుకూలమైన స్థానిక ఆర్థిక వ్యవస్థ (ప్రో-వర్కర్ లోకల్ ఎకానమీ) నిర్మాణంపై ఉండాలని సూచిస్తున్నారు.
మొత్తం మీద చూస్తే, మమ్దానీ ఒకవైపు తన సిద్ధాంతాలకు కట్టుబడి ఉండాలని, మరోవైపు వ్యాపార వర్గాల విశ్వాసాన్ని కోల్పోకుండా నగర ఆర్థికాభివృద్ధిని కొనసాగించాలని ప్రయత్నిస్తున్న రాజకీయ సమతుల్యతను ప్రతిబింబిస్తోంది.
ది న్యూయార్క్ టైమ్స్ కథనం ఆధారంగా ఈ వ్యాసాన్ని అందిస్తున్నాము.
అనువాదం: ఆర్ లక్ష్మయ్య.
About the Author
Discover more from The Wire Telugu
Subscribe to get the latest posts sent to your email.
